Yaponiya və Venesuela sahillərində qısa zaman fərqi ilə iki güclü zəlzələ baş verib.
ilkinxeber.az informasiya agentliyi məlumat verir ki, təbii fəlakətlər nəticəsində ölən və xəsarət alanların olduğu bildirilir.
Məlumata görə, Venesuela sahillərində 7,1 bal gücündə zəlzələ qeydə alınıb. Yeraltı təkanların episentri Moron şəhəri yaxınlığında, ocağı isə təxminən 10 kilometr dərinlikdə yerləşib. Hadisə nəticəsində bir neçə çoxmərtəbəli yaşayış binasına ciddi ziyan dəyib.
Rəsmi şəxslərin açıqlamasına əsasən, ölkədə fövqəladə vəziyyət elan olunub. Həmçinin Karakasdakı Mayketiya Beynəlxalq Hava Limanı zədələr səbəbindən fəaliyyətini dayandırıb.
Zəlzələdən sonra Puerto-Riko və ABŞ-ın Virgin adaları üçün sunami xəbərdarlığı edilib.
Eyni vaxtda Yaponiyanın İvate prefekturası sahillərində də 6,9 bal gücündə zəlzələ baş verib. Sakit okeanda qeydə alınan yeraltı təkanlar səbəbindən Yaponiya hakimiyyəti də sunami təhlükəsi ilə bağlı xəbərdarlıq yayıb və vəziyyəti nəzarətdə saxlayır.
