ABŞ Prezidenti Donald Trump Azərbaycan Prezidenti İlham Əliyevin IV Şuşa Qlobal Media Forumundakı çıxışı ilə bağlı məqaləni özünün “Truth Social” sosial şəbəkə hesabında paylaşıb.
ilkinxeber.az informasiya agentliyi məlumat verir ki, sözügedən material “Breitbart News” nəşrinin müxbiri Coşua Kleyn tərəfindən hazırlanıb. Məqalədə Prezident İlham Əliyevin forum çərçivəsində jurnalistlərin suallarını cavablandırarkən səsləndirdiyi fikirlər əks olunub.
Yazıda İlham Əliyevin Donald Trampı “sülh adamı” kimi xarakterizə etməsi, Ermənistanla Azərbaycan arasında sülh prosesinə verdiyi dəstəyə görə ona təşəkkürünü bildirməsi diqqətə çatdırılıb. Eyni zamanda, əvvəlki ABŞ administrasiyalarının uzun illər ərzində münaqişənin həllindən daha çox onun dondurulmuş vəziyyətdə saxlanmasına üstünlük verdiyi ilə bağlı fikirlərə də yer verilib.
Qeyd edək ki, 13–14 iyul tarixlərində keçirilən IV Şuşa Qlobal Media Forumu “Sülhün təşviqində medianın missiyası: həqiqətin bərpası və etimadın yenidən qurulması” mövzusuna həsr olunub. Tədbirdə dünyanın 50-dən çox ölkəsindən yüzlərlə media nümayəndəsi, ekspert və rəsmi şəxslər iştirak ediblər.
