Gürcüstan Bakı–Tbilisi–Bakı marşrutu üzrə əlavə qatar reysinin təşkilinə hələlik hazır deyil.
ilkinxeber.az informasiya agentliyi məlumat verir ki, bu barədə nəqliyyat məsələləri üzrə ekspert Eldəniz Cəfərov sosial şəbəkə hesabında paylaşım edib.
Ekspert bildirib ki, “Azərbaycan Dəmir Yolları” QSC tərəfindən Bakı–Tbilisi–Bakı marşrutu üzrə əlavə qatar reysi üçün hazırlıqlar tamamlanıb və qatar tam hazır vəziyyətə gətirilib. Lakin Gürcüstan tərəfi bu əlavə reysi qəbul etməyə hələ hazır deyil.
Onun sözlərinə görə, bunun əsas səbəbi Gürcüstan ərazisində mövcud olan texniki çətinliklərdir. Belə ki, qatarların stansiyalarda manevr etməsi və hərəkətinin təmin olunması zamanı elektrik təchizatı ilə bağlı problemlər yaranır. Bundan əlavə, Gürcüstan sərhəd xidməti də əlavə reys üzrə sərnişin yoxlamalarını həyata keçirmək üçün hələ tam hazır vəziyyətdə deyil.
Eldəniz Cəfərov qeyd edib ki, son dövrlərdə Gürcüstan tərəfində sərhəd yoxlamalarının müddəti də uzanıb. Bu isə ümumilikdə qatarların hərəkətində gecikmələrə səbəb olur.
“Elektrik təchizatı ilə bağlı problemlər də qatarların qrafikdən geri qalmasına təsir edir. Azərbaycan tərəfi əlavə reysi təşkil etmək üçün bütün hazırlıqları görsə də, Gürcüstan tərəfinin hazır olmaması səbəbindən proses ləngiyir”, – deyə ekspert vurğulayıb.
Qeyd edək ki, Bakı–Tbilisi–Bakı sərnişin qatarı pandemiya səbəbindən 2020-ci ilin mart ayında dayandırılmışdı. Uzun fasilədən sonra marşrut üzrə sərnişin daşımaları 2026-cı il mayın 26-dan etibarən yenidən bərpa olunub.
Xatırladaq ki, son günlər Gürcüstanda müşahidə olunan genişmiqyaslı elektrik enerjisi problemləri də dəmir yolu nəqliyyatına təsir göstərib və bu səbəbdən qatarların hərəkətində gecikmələr qeydə alınıb.
