Dövlət İmtahan Mərkəzi magistratura səviyyəsinə qəbul üzrə ixtisaslaşma seçiminin müddətinin uzadıldığını açıqlayıb.
ilkinxeber.az informasiya agentliyinin əldə etdiyi məlumata görə, müsabiqə şərtlərini ödəyən və ixtisaslaşma seçimində iştirak hüququ qazanan bakalavrlar bu gün saat 13:00-dək internet üzərindən elektron ərizələrini təsdiqləyərək ixtisaslaşma seçimini həyata keçirə bilərlər.
DİM-in məlumatına əsasən, bu gün saat 09:15-ə olan vəziyyətə görə ümumilikdə 15 633 bakalavr elektron ərizəsini təsdiqləyib. Onlardan 14 251 nəfəri Azərbaycan, 1 382 nəfəri isə rus bölməsi üzrə müraciət edib.
Namizədlər bitirdikləri bakalavr ixtisasına uyğun olmaq şərti ilə 20-dək ixtisaslaşma seçə və onları istədikləri ardıcıllıqla elektron ərizəyə daxil edərək təsdiqləyə bilərlər.
Qeyd edək ki, seçilən ixtisaslaşmalar namizədin bakalavr ixtisasına uyğun olmalı, bəzi proqramlarda isə xarici dil tələbi də nəzərə alınmalıdır. Qəbul aparılan ixtisaslaşmalar və ayrılmış plan yerləri barədə ətraflı məlumat “Magistr” jurnalının 4-cü nömrəsində yer alıb.
