Birinci ixtisas qrupu üzrə 600-dən yuxarı keçid balı olan ixtisaslarda balların 1-2 bal azalacağı gözlənilir.
İlkinxeber.az informasiya agentliyi xəbər verir ki, bu barədə Dövlət İmtahan Mərkəzinin (DİM) sədri Məleykə Abbaszadə jurnalistlərə açıqlamasında bildirib.
Onun sözlərinə görə, 500-600 bal intervalında keçid ballarında təxminən 16 bala qədər azalma müşahidə oluna bilər. 400-500 bal aralığında isə bu azalma təxminən 5 bal civarında proqnozlaşdırılır. Əksinə, 300-400 bal intervalında nəticə göstərən abituriyentlərin sayının artması səbəbindən keçid ballarının yüksələcəyi gözlənilir.
DİM sədri qeyd edib ki, ikinci ixtisas qrupu üzrə demək olar bütün bal intervallarında cüzi azalma müşahidə olunacaq. Bu azalma əsasən 1-3 bal arasında dəyişə bilər. 300-400 bal intervalında isə keçid ballarının 12 bala qədər aşağı düşməsi mümkündür. Lakin 200-300 bal aralığında abituriyent sayının artması səbəbindən müsabiqənin güclənəcəyi və keçid ballarında 3-4 bal artım olacağı ehtimal edilir.
Üçüncü ixtisas qrupu üzrə isə 600-dən yuxarı bal toplayan ixtisaslarda keçid ballarının 3-4 bal azalacağı gözlənilir. Bununla yanaşı, 500-600 bal intervalında sıx nəticələr səbəbindən 3-4 bal artım ehtimal olunur. 400-500, 300-400 və 200-300 bal aralıqlarında da keçid ballarının təxminən 1-8 bal artacağı proqnozlaşdırılır.
Dördüncü ixtisas qrupu üzrə isə vəziyyət daha gərgindir. Hazırda 1000-dən çox abituriyent 600-dən yuxarı bal topladığı üçün bu kateqoriyada keçid ballarının 15-17 bala qədər artacağı gözlənilir. Məsələn, ötən il 605 balla qəbul mümkün olan ixtisaslara bu il daha yüksək bal tələb oluna bilər. 500-600 bal intervalında da artım gözlənilir. 400-500 bal aralığında balların əsasən sabit qalacağı, 200-300 bal intervalında isə müəyyən qədər azalacağı ehtimal olunur.
