İlkinxeber.az informasiya agentliyi məlumat verir ki, avqustun 15-dən Bakı Metropoliteninin “qırmızı” və “yaşıl” xətlərinin ayrılması layihəsi ilə əlaqədar “Nizami” və “28 May” stansiyaları arasında qatarların hərəkəti dayandırılıb.
Bu səbəbdən yeni tədris ilinin başlanması ilə sərnişin axınının artacağı və xüsusilə tələbələrin gediş-gəlişi zamanı metro və ictimai nəqliyyatda sıxlığın yaranacağı gözlənilir.
Təhsil məsələləri üzrə ekspert Səbuhi Abdullayev bildirib ki, sentyabr ayında həm tələbə axını, həm də “Formula-1” yarışları ilə əlaqədar Bakıda nəqliyyat sisteminə əlavə yük düşə bilər.
Ekspertin sözlərinə görə, belə vəziyyətdə bütün ali təhsil müəssisələrinin distant təhsilə keçməsi əvəzinə, müəyyən ixtisaslar üzrə distant dərslərin təşkili nəzərdən keçirilə bilər. Xüsusilə praktiki məşğələlər tələb etməyən humanitar istiqamətli ixtisaslarda onlayn təhsildən istifadə ümumi sərnişin yükünün azalmasına kömək edə bilər.
Səbuhi Abdullayev həmçinin dərs qrafiklərinin dəyişdirilməsinin mümkün variant olduğunu qeyd edib. Onun fikrincə, əyani və distant dərslərin növbəli təşkili, bəzi günlərdə dərslərin onlayn keçirilməsi və müəyyən ixtisasların müvəqqəti olaraq distant formata keçirilməsi nəqliyyatda yaranacaq sıxlığın azaldılmasına imkan verə bilər.
Ekspert qeyd edib ki, ali təhsil müəssisələrinin pandemiya dövründən distant təhsil sahəsində müəyyən təcrübəsi mövcuddur.
