Suriyada beynəlxalq kartlarla ödənişlər yenidən başladı

İlkinxeber.az informasiya agentliyi məlumat verir ki, Suriyada beynəlxalq bank kartları ilə ödənişlərin yenidən həyata keçirilməsinə başlanılıb.
Suriya Prezidenti Əhməd əl-Şaraa Dəməşqin Köhnə Şəhərində yerləşən restoranlardan birində hesabı beynəlxalq “Visa” kartı ilə ödəyərək ölkədə beynəlxalq kart sisteminin fəaliyyətinin bərpasını simvolik şəkildə nümayiş etdirib.
Suriya televiziyasının yayımladığı görüntülərdə prezidentin kartla ödəniş etdiyi əks olunub. Əməliyyat zamanı Suriya Mərkəzi Bankının sədri Səfvat Rəsan da iştirak edib.
“Visa” şirkəti Suriya Mərkəzi Bankı, “Fransabank” və “Paymera” ilə əməkdaşlıq çərçivəsində ölkədə beynəlxalq kart əməliyyatlarının uğurla sınaqdan keçirildiyini açıqlayıb.
Yeni sistemin Suriyaya səfər edən xarici vətəndaşlar üçün ödənişləri asanlaşdıracağı, həmçinin ölkənin qlobal rəqəmsal iqtisadiyyata inteqrasiyasını sürətləndirəcəyi bildirilir.
Beynəlxalq kart ödənişlərinin bərpası ABŞ-ın Suriyaya münasibətdə tətbiq etdiyi uzunmüddətli məhdudiyyətlərin yumşaldılmasından sonra baş verib.
Əhməd əl-Şaraa Dəməşq Beynəlxalq Sərgisinin açılışında çıxışı zamanı bildirib ki, sanksiyaların aradan qaldırılmasından sonra Suriya yenidənqurma və inkişaf mərhələsinə qədəm qoyub.
Prezident ölkəsinin əvvəlki mövqeyini bərpa edərək Şərqlə Qərb arasında mühüm ticarət dəhlizi, əlaqələndirici körpü və regional iqtisadi mərkəzə çevrilməyi hədəflədiyini vurğulayıb.