Qohumlar arasında bıçaqlı dava

İlkinxeber.az informasiya agentliyi məlumat verir ki, Sabunçu rayonunda qohumlar arasında baş vermiş bıçaqlanma hadisəsi ilə bağlı məhkəmə prosesi davam edir.
Hadisə bu il martın 27-də baş verib. İttihama görə, Səid Babazadə yaxın qohumu Elşad Bayramovla aralarında yaranan mübahisə zamanı onu bıçaqla vuraraq ağır xəsarət yetirib.
Məhkəmədə ifadə verən Səid Babazadə bildirib ki, hadisədən əvvəl Elşadın insanların yanında ona irad bildirməsi xoşuna gəlməyib. Evə qayıtdıqdan sonra telefonla danışarkən aralarında mübahisə yaranıb.
Səidin sözlərinə görə, əsəbi vəziyyətdə stolun üzərindəki bıçağı cibinə qoyub. Elşadın məhəlləyə gəldiyini öyrəndikdən sonra çölə çıxıb onu gözləyib. Görüşdükdə isə aralarında əlbəyaxa dava başlayıb.
Dava zamanı Səid ayağından xəsarət aldığını və qanaxma olduğunu sonradan gördüyünü bildirib. O, Elşadı qorxutmaq məqsədilə bıçağı çıxardığını, əlbəyaxa mübarizə zamanı isə onu qolundan yaraladığını deyib.
Zərərçəkmiş Elşad Bayramov isə Səidin onun xalası oğlu olduğunu bildirib. O, mübahisə zamanı Səidin onu iki dəfə bıçaqla vurduğunu, lakin həmin an xəsarəti hiss etmədiyini deyib. Evə getdikdən sonra sinəsində ağrı hiss etdiyini və bıçaq yarasını gördüyünü qeyd edib.
Elşad məhkəmədə Səidlə barışdıqlarını və ondan şikayətçi olmadığını bildirib.
Faktla bağlı Səid Babazadə barəsində Cinayət Məcəlləsinin 126.1-ci maddəsi ilə (qəsdən sağlamlığa ağır zərər vurma) cinayət işi başlanıb. Onun barəsində polisin nəzarəti altına vermə qətimkan tədbiri seçilib.
Məhkəmənin növbəti iclası sentyabrın 18-də saat 10:40-a təyin olunub.