2013-cü ildə Qərb Universitetinin tələbəsi Vüsal Şilderin qətlə yetirilməsi ilə bağlı cinayəti sifariş etməkdə şübhəli bilinən Xəyal Əli-Zadənin cinayət işi üzrə ibtidai istintaq başa çatıb.
ilkinxeber.az informasiya agentliyi xəbər verir ki, bu barədə Azərbaycan Baş Prokurorluğunun Mətbuat xidməti məlumat yayıb.
İstintaq zamanı Xəyal Məzahir oğlu Əli-Zadənin Vüsal Şilderin qətlə yetirilməsinin təşkilinə və cinayətin törədilməsinə rəhbərlik etməsinə dair əsaslı şübhələr müəyyən edilib. Bununla əlaqədar onun barəsində təqsirləndirilən şəxs qismində cəlb edilməsinə dair qərar qəbul olunub.
Xəyal Əli-Zadə həmin vaxt Azərbaycan ərazisindən kənarda olduğundan ona ittiham elan etmək mümkün olmayıb. İstintaqdan yayındığı üçün onun barəsində beynəlxalq axtarış elan edilib.
Axtarış tədbirləri nəticəsində onun Birləşmiş Ərəb Əmirliklərində olduğu müəyyənləşdirilib. Azərbaycanın Baş Prokurorluğu tərəfindən onun ölkəyə ekstradisiyası istiqamətində müvafiq tədbirlər görülüb.
Nəticədə Xəyal Əli-Zadə 2026-cı il yanvarın 11-də Birləşmiş Ərəb Əmirliklərinin səlahiyyətli orqanları tərəfindən saxlanılıb və daha sonra Azərbaycana ekstradisiya edilib.
Toplanmış sübutlar əsasında Xəyal Əli-Zadəyə Cinayət Məcəlləsinin 32.3 və 120.2.5-ci maddələri ilə, yəni tamah məqsədilə qəsdən adam öldürmə cinayətini təşkil etmə ittihamı irəli sürülüb.
Onun barəsində həbs qətimkan tədbiri seçilib.
İbtidai istintaq yekunlaşdırılıb, cinayət işi üzrə ittiham aktı təsdiqlənib və iş baxılması üçün Bakı Ağır Cinayətlər Məhkəməsinə göndərilib.
Qeyd edək ki, Vüsal Şilderin qətli ilə bağlı daha əvvəl Elman İsgəndərov və Seymur Talıbov təqsirləndirilən şəxs qismində məsuliyyətə cəlb ediliblər.
Məhkəmənin müvafiq hökmləri ilə Elman İsgəndərov 15 il, Seymur Talıbov isə 12 il müddətinə azadlıqdan məhrum ediliblər.
