Azərbaycan Respublikasının Prezidenti İlham Əliyev sentyabrın 14-də Müsəlman Ağsaqqalları Şurasının baş katibi Məhəmməd Əbdülsalamı qəbul edib.
ilkinxeber.az informasiya agentliyi xəbər verir ki, görüşdə Azərbaycan ilə Müsəlman Ağsaqqalları Şurası arasında əməkdaşlığın uğurlu şəkildə davam etdiyi qeyd olunub.
Söhbət zamanı Prezident İlham Əliyev ilə Məhəmməd Əbdülsalamın əvvəlki görüşləri məmnunluqla xatırlanıb. İslam həmrəyliyinin gücləndirilməsi istiqamətində Azərbaycanın beynəlxalq səviyyədə həyata keçirdiyi təşəbbüslərin əhəmiyyəti vurğulanıb.
Bu baxımdan Türk Dövlətləri Təşkilatının Müsəlman dini liderlərinin Bakıda keçirilən 7-ci görüşünün, eləcə də gələn il Azərbaycanda baş tutacaq İslam Əməkdaşlıq Təşkilatının Zirvə Toplantısının mühüm əhəmiyyət daşıdığı bildirilib.
Görüşdə Azərbaycanda dini münasibətlərin yüksək səviyyədə tənzimləndiyi də qeyd olunub.
Söhbət zamanı dövlət başçısının bu ilin əvvəlində “Zayed İnsan Qardaşlığı Mükafatı”na layiq görülməsi də xatırlanıb. Məhəmməd Əbdülsalam mükafatın sertifikatını Prezident İlham Əliyevə təqdim edib.
