ilkinxeber.az informasiya agentliyi xəbər verir ki, kommersiya hava daşımalarını həyata keçirən təyyarələrdə hava gəmisi heyətinin iş, uçuş və istirahət vaxtının yenidən tənzimlənməsi təklif olunur.
Məsələ Milli Məclisin Əmək və sosial siyasət komitəsinin iclasında müzakirəyə çıxarılan Əmək Məcəlləsinə və “Aviasiya haqqında” Qanuna dəyişiklik layihəsində öz əksini tapıb.
Layihəyə əsasən, hava gəmisi heyətinin iş və istirahət rejimi Beynəlxalq Mülki Aviasiya Təşkilatının beynəlxalq standartları və tövsiyə olunan təcrübəsi, eləcə də səlahiyyətli qurum tərəfindən müəyyən ediləcək qaydalar əsasında tənzimlənəcək.
Qanunvericilikdə və onun əsasında qəbul edilmiş normativ hüquqi aktlarda nəzərdə tutulmayan məsələlər isə Əmək Məcəlləsinin müvafiq normaları ilə müəyyən ediləcək.
Təklifə görə, kommersiya hava daşımalarında çalışan hava gəmisi heyətinin iş vaxtı 7, 14 və 28 ardıcıl gün, həmçinin bir təqvim ili üzrə maksimal iş saatları əsasında müəyyənləşdiriləcək.
Uçuş vaxtı isə 28 ardıcıl gün, bir təqvim ili və ardıcıl 12 təqvim ayı üzrə maksimal uçuş saatları nəzərə alınmaqla tənzimlənəcək.
Hazırda Əmək Məcəlləsinə əsasən gündəlik normal iş vaxtı 8, həftəlik normal iş vaxtı isə 40 saatdan artıq ola bilməz. Uçuş və uçuş təlimatçı heyəti üçün həftəlik iş vaxtı 36 saat müəyyən edilib.
Cəmlənmiş iş vaxtı uçotu tətbiq edildikdə gündəlik iş vaxtının 12 saatdan, gecə vaxtına düşdükdə isə 11 saatdan artıq olmaması nəzərdə tutulur.
Layihədə qeyd olunur ki, mövcud məhdudiyyətlər 13-14 saat davam edən Nyu-York, Seul və digər uzaq istiqamətlərə uçuşların həyata keçirilməsini çətinləşdirir, bəzi hallarda isə onları iqtisadi baxımdan səmərəsiz edir.
Yeni yanaşma hava gəmisi heyətinin yorğunluğunun idarə edilməsi üzrə beynəlxalq standartlara uyğunlaşmanı nəzərdə tutur. Bununla da aviasiya heyətinin iş və istirahət rejiminin daha çevik şəkildə tənzimlənməsi planlaşdırılır.
Dəyişikliklərin qəbul edilməsi yerli aviaşirkətlərin beynəlxalq bazarda rəqabət imkanlarının artırılmasına və yeni uçuş istiqamətlərinin açılmasına şərait yarada bilər.
Layihə qəbul olunacağı təqdirdə Nazirlər Kabineti tərəfindən kommersiya hava daşımalarını həyata keçirən hava gəmisi heyətinin uçuş, iş və istirahət vaxtının, eləcə də yorğunluğunun idarə edilməsinin tənzimlənməsinə dair yeni qaydaların təsdiqlənməsi gözlənilir.
