ilkinxeber.az informasiya agentliyinin apardığı müşahidələr zamanı Bakıda və Sumqayıtda taksi xidmətlərinin qiymətlərində gün ərzində nəzərəçarpan dəyişikliklərin olduğu müəyyənləşib.
Müşahidələrə əsasən, eyni istiqamət üzrə taksi sifarişinin qiyməti qısa müddət ərzində 5-6 manatadək arta bilir. Belə ki, Sumqayıtda yerləşən “Bağçaşəhər” yaşayış kompleksindən metronun “20 Yanvar” stansiyasına saat 06:49-da sifarişin qiyməti 17,90 manat olduğu halda, saat 07:13-də eyni marşrut üzrə qiymət 22,90 manata yüksəlib.
Qiymət fərqi ekonom, komfort və prioritet kateqoriyalı sifarişlərdə də müşahidə olunub.
Digər müşahidədə isə Bakı şəhəri, Dadaş Bünyadzadə küçəsi, 9 ünvanından “28 Mall” istiqamətinə taksi gedişinin qiyməti saat 06:49-da 14,90 manat, saat 08:11-də isə 17,90 manat göstərilib.
Maraqlı məqam odur ki, eyni iki ünvan arasında gediş və qayıdış istiqamətlərində də fərqli qiymətlər qeydə alınıb. Cavadxan küçəsi, 40 ünvanından Dilbər Əliyeva küçəsi, 161 ünvanına gediş 6,90 manat olduğu halda, əks istiqamətdə qiymət 9,90 manat təşkil edib.
Taksi xidmətlərində qiymətlərin tələbatın səviyyəsi, yol hərəkətinin intensivliyi, hava şəraiti və digər dinamik amillərə uyğun dəyişməsi mümkündür. Bu səbəbdən eyni marşrut üzrə müxtəlif saatlarda fərqli tariflərin tətbiqi müşahidə oluna bilər.
ilkinxeber.az informasiya agentliyi taksi xidmətlərində qiymətlərin günün müxtəlif saatlarında necə dəyişdiyini araşdırmaqda davam edir.
