İlkin Şakiroğlu yazır: Bakıya niyə məhkumuq?

Bakı yaşanmalı şəhər statusunu çoxdan itirib. Lakin biz əl çəkmirik. Daha doğrusu, əl çəkməyə imkanımız yoxdur.
Çünki dolanışığımız buradadır. İş buradadır, qazanc buradadır, ailənin gündəlik ehtiyaclarını qarşılamaq üçün lazım olan imkanların böyük hissəsi bu şəhərdə cəmlənib. İnsan narazıdır, yorulub, tıxacdan bezib, bahalıqdan əziyyət çəkir, amma yenə də səhər Bakının küçələrinə çıxır. Çünki başqa yolu yoxdur.
Rayonlara baxanda vəziyyət daha aydın görünür. Orada həyat davam edir, insanlar yaşayır, torpaq var, ev var, doğma kənd var. Amma iş imkanları məhduddur. Gənc insan ali məktəbi bitirəndən sonra öz rayonunda hansı işə düzələcəyini düşünür. Ailə qurmaq, ev saxlamaq, uşağı böyütmək üçün sabit gəlir lazımdır. Bu gəliri tapmaq üçün isə çoxlarının yolu yenə Bakıya düşür.
Beləcə şəhər insanları özünə çəkir.
Bakıya gələnlərin hamısı bu şəhəri sevdiyi üçün gəlmir. Kimisi kəndini, kimisi rayonunu, kimisi ata evini qoyub gəlir. Bir çanta götürüb şəhərə gəlir və burada özünə həyat qurmağa çalışır. Sonra illər keçir, insan artıq geri qayıtmaq istəsə də qayıda bilmir. Çünki orada işi yoxdur.
Əslində Bakının ən böyük yükü də budur. Şəhər təkcə öz əhalisini daşımır. Ölkənin müxtəlif bölgələrində iş və gəlir imkanlarının məhdud olması Bakının üzərinə əlavə yük qoyur.
Nəticədə şəhər sıxlaşır, yollar dolur, mənzil qiymətləri artır, kirayələr bahalaşır, nəqliyyat ağırlaşır. İnsan bir tərəfdən işləyib pul qazanır, digər tərəfdən qazandığının böyük hissəsini şəhərdə yaşamağa xərcləyir.
Bu, qəribə bir dövrədir. İnsan Bakıya dolanışıq üçün gəlir, sonra Bakıda yaşamağın xərcləri onun qazancını aparır.
Ona görə “Bakı niyə bu qədər sıxdır?” sualının cavabı yalnız Bakının özündə axtarılmamalıdır. Ölkənin digər bölgələrində iş yerləri, istehsal, xidmət sahələri və normal qazanc imkanları artmadıqca insanların paytaxta axını da dayanmayacaq.
Biz Bakıdan əl çəkmirik, çünki çoxumuz buna məhkumuq.
Əgər rayonlarda insan öz zəhməti ilə normal dolana bilsə, doğulduğu yerdə iş tapa bilsə, ailəsini orada saxlaya bilsə, Bakı da bir az nəfəs ala bilər.
Məsələ insanları Bakıya gətirməmək deyil. Məsələ insanı Bakıya gəlməyə məcbur etməməkdir.