İlkinxeber.az informasiya agentliyi məlumat verir ki, Ermənistanın xarici işlər naziri Ararat Mirzoyan Azərbaycanla sülh sazişi imzalanmadan TRIPP layihəsinin həyata keçirilməsinə başlanılmasının mümkün olduğunu bildirib.
Mirzoyan parlamentdə çıxışı zamanı layihənin sülh prosesinə töhfə verə biləcəyini də vurğulayıb. Onun fikrincə, TRIPP-in reallaşdırılması və iki ölkə arasında əlaqələrin genişlənməsi sülh sazişinin imzalanmasını sürətləndirə bilər.
Məsələ ilə bağlı Milli Məclisin deputatı Elçin Mirzəbəyli Baku TV-yə açıqlamasında Ermənistan rəhbərliyinin bəyanatlarını ziddiyyətli hesab edib.
Deputatın sözlərinə görə, TRIPP layihəsinin Ermənistan ərazisində tikinti işlərinə başlanılması hüquqi baxımdan sülh sazişinin imzalanmasından əvvəl də mümkün ola bilər. Lakin Azərbaycanla Naxçıvan arasında nəqliyyat əlaqəsi təmin edilmədiyi təqdirdə, layihənin beynəlxalq əhəmiyyəti məhdud qala bilər.
Qeyd edək ki, TRIPP layihəsi Azərbaycanın əsas ərazisi ilə Naxçıvan arasında Ermənistanın Sünik bölgəsindən keçməklə nəqliyyat bağlantısının yaradılmasını nəzərdə tutur. Layihənin reallaşması regionda nəqliyyat və iqtisadi əlaqələr baxımından əhəmiyyət daşıyır.
