Cəlilabadda 28 May Müstəqillik Gününə həsr olunmuş dəyirmi masa keçirilib
Cəlilabad rayonunda 28 May Müstəqillik Günü münasibətilə dəyirmi masa təşkil olunub.
İlkinxeber.az xəbər verir ki, tədbir Cəlilabad rayon Heydər Əliyev Mərkəzində baş tutub. Tədbirdə rayon rəhbərliyi, hüquq mühafizə orqanlarının əməkdaşları, idarə və müəssisələrin rəhbərləri, ziyalılar, eləcə də ictimaiyyət nümayəndələri iştirak ediblər.
Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Ümummilli Lider Heydər Əliyevin və Azərbaycanın müstəqilliyi, ərazi bütövlüyü uğrunda canından keçən şəhidlərin əziz xatirəsi bir dəqiqəlik sükutla yad olunub.
Tədbirdə çıxış edən Cəlilabad Rayon İcra Hakimiyyətinin başçısı Rafiq Cəlilov iştirakçıları 28 May Müstəqillik Günü münasibətilə təbrik edərək bildirib ki, Azərbaycan Xalq Cümhuriyyətinin 1918 ci ildə yaradılması dövlətçilik tariximizin ən mühüm səhifələrindən biridir. Onun sözlərinə görə, cəmi 23 ay fəaliyyət göstərməsinə baxmayaraq, Cümhuriyyət milli dövlətçilik ənənələrinin formalaşmasına mühüm töhfələr verib.
Qeyd olunub ki, bu gün Azərbaycanın qazandığı uğurlar, beynəlxalq aləmdə mövqeyinin möhkəmlənməsi və davamlı inkişafı məhz müstəqillik ideyalarının uğurlu davamıdır. Vurğulanıb ki, Ümummilli Lider Heydər Əliyevin əsasını qoyduğu siyasi kurs Prezident İlham Əliyev tərəfindən uğurla davam etdirilir.
Tədbir çərçivəsində Müstəqillik Gününə həsr olunmuş videoçarx nümayiş olunub.
Daha sonra çıxış edən rayon ictimaiyyətinin nümayəndələri 28 May tarixinin Azərbaycan xalqının həyatında xüsusi yer tutduğunu bildirərək bu günün milli qürur və həmrəylik rəmzi kimi hər zaman böyük ehtiramla qeyd olunacağını vurğulayıblar.
