Milli Hidrometeorologiya Xidmətinin yaydığı son proqnoza əsasən, ölkə ərazisində hava şəraitində dəyişkənliklər müşahidə olunacaq, bəzi bölgələrdə isə qısamüddətli yağıntılar istisna edilmir.
Havanın temperaturu Bakıda və Abşeron yarımadasında gecə 17–20 dərəcə isti, gündüz isə 22–27 dərəcə isti intervalında olacaq. Atmosfer təzyiqində azalma qeydə alınaraq 756 mm civə sütunundan 750 mm-ə enəcək. Nisbi rütubət isə gecə 70–75 faiz, gündüz saatlarında 60–65 faiz arasında dəyişəcək.
Rayonlarda da hava şəraitinin oxşar xarakter daşıması proqnozlaşdırılır. Belə ki, əksər bölgələrdə günün böyük hissəsində əsasən yağmursuz hava gözlənilsə də, gündüz saatlarından etibarən şimal və qərb rayonlarında başlayaraq bəzi ərazilərdə fasilələrlə yağış yağacağı ehtimal edilir. Ayrı-ayrı yerlərdə yağıntının qısamüddətli olaraq intensiv və güclü xarakter alacağı, şimşək və dolu hadisələrinin qeydə alınacağı bildirilir. Yüksək dağlıq ərazilərdə isə qar yağması ehtimalı da var. Gecə və səhər saatlarında bəzi bölgələrdə duman müşahidə oluna bilər, qərb küləyinin isə arabir güclənəcəyi proqnozlaşdırılır.
Rayonlarda temperatur gecə 16–19 dərəcə isti, gündüz 26–31 dərəcə isti, dağlıq ərazilərdə isə gecə 7–12 dərəcə isti, gündüz 16–21 dərəcə isti, bəzi yerlərdə isə 23–26 dərəcəyə qədər yüksələcək.
