Samux rayonunda 5 nəfərdə ilkin müayinələr zamanı qarayara xəstəliyinin əlamətləri müəyyən edilib. Hazırda həmin şəxslərin müalicəsi Gəncə Şəhər Birləşmiş Xəstəxanasının nəzdində fəaliyyət göstərən Yoluxucu xəstəliklər şöbəsində aparılır.
İlkinxeber.az informasiya agentliyi xəbər verir ki, infeksionist Mərdan Əliyev qarayara xəstəliyinin yayılma yolları, əsas əlamətləri və yoluxma riskləri barədə məlumat verib.
Mütəxəssisin sözlərinə görə, qarayara çöpşəkilli bakteriyalar tərəfindən törədilən infeksion xəstəlikdir və əsasən heyvanlardan insanlara keçir. İnsandan insana yoluxma isə nadir hallarda baş verir.
Qarayaranın ən geniş yayılmış forması dəri formasıdır. Xəstə heyvanın qanı və ya ifrazatı dəridəki mikrozədələrlə təmas etdikdə bakteriya orqanizmə daxil ola bilər. İlkin mərhələdə dəridə kiçik səpgilər yaranır. Daha sonra həmin səpgilər böyüyərək yaraya çevrilir. Yaranın orta hissəsi nekroz səbəbindən qara rəng alır və adətən ağrı vermir. Yaranın ətrafında isə qızartı və şişkinlik müşahidə olunur.
Mərdan Əliyev bildirib ki, qarayaranın ağciyər və bağırsaq formaları daha təhlükəli hesab edilir. Xəstəliyə yoluxan şəxslərin xəstəxana şəraitində müalicə olunması tövsiyə edilir.
İnfeksionistin sözlərinə görə, yoluxmanın mənbəyi olan heyvan müəyyənləşdirilməli və zəruri hallarda həmin ərazidə sanitar-epidemioloji tədbirlər görülməlidir.
Mütəxəssis qeyd edib ki, qarayara əsasən insandan insana keçmədiyindən karantin rejiminin tətbiqinə ehtiyac yoxdur.
