Damcıların arxasında gizlənən dərdlər, Saleh Seyfullayev

Bu gecə yağış yağdı,

Bu gecə göz qırpmadım.

Səhərəcən eyvandan

Boylandım Qarabağa…

Göy kişnədi durmadan,

İldırım Kəlbəcərin

Sinəsini dağladı.

Xankəndim dilə gəldi,

Sellər-sular çağladı.

Bu gecə yağış yağdı,

Yox, bu yağış deyildi,

Şuşam idi sevincdən

Səhərəcən ağladı…

Hönkürtüsün eşitdim,

Hayqırtısın eşitdim.

Otuz illik həsrətin

Qışqırtısın eşitdim.

Bu nə səs idi Allah,

Bu səs hardan gəlirdi?

Xocalım inləyirdi.

Arabir ildırım da

Ara verib susurdu.

Sanki Allahın özü

Bu səsi dinləyirdi.

Bu gecə yağış yağdı,

Bu gecə göz qırpmadım.

Səhərəcən eyvandan

Boylandım Qarabağa.

Dayandım yağış altda

Zülüm-zülüm ağladım.

Əsgərim səngərdədi

Mən necə arsız-arsız

Girim isti otağa?

Bu gecə göz qırpmadım,

Boylandım Qarabağa…

                                                Saleh Seyfullayev 

 

QAPI

Qapını döymək istəyirəm,

Əlim gəlmir necə döyüm?

Tutaq döydüm

anası açdı,

Necə deyim kiməm mən?

 

Necə deyim

Mən sənin əsgər oğlunla,

Mən sənin igid oğlunla,

Əsgərlikdə dost olmuşam

Necə deyim?

 

Deməzmi ki xoş gəlmisən,

Bəs oğlum niyə gəlmədi?

Deməzmi ki necə dostsan,

Mənim oğlum şəhid oldu,

Oğul, sən niyə ölmədin?

 

Deməzmi ki hər küləklə

Oğlumdan bir salam gəlsin.

Deməzmi ki sən qayıt get,

Qoy yerinə balam gəlsin?

 

Necə deyim qurban olum,

Necə deyim ağrın alım?

Necə deyim gəlmişəm ki,

Mən də sənin oğlun olum?

 

Axı necə qucaqlayım,

Əllərini öpüb gedim?

Qaysaqlanmış yarasına

Bir ovuc duz səpib gedim.

 

Yox qətiyyən, yox qətiyyən,

Mən bunu edə bilmərəm.

Bağışla dost, bir də heç vaxt

Mən sizə gedə bilmərəm…

Saleh Seyfullayev 

 

Yağış yağır pəncərədən baxıram,

Damcı-damcı yarpaqlardan süzülür.

İslaq-islaq pırpızlaşmış sərçələr,

Sıralanıb tel üstündə düzülür.

Hey baxıram təbim gəlmir nə yazım?

Söz vərəqə, vərəq sözə usanır.

Mən düşmüşəm romantika eşqinə,

Neçə evsiz çöldə qalıb islanır.

Bu yağışdan ilham alma şairim,

Bu yağışdan ilham almaq gərəksiz.

Neçə fəhlə bu gün işə getmədi,

Neçə ailə bu gün qaldı çörəksiz.

Bu yağışdan qorunmağa dünyada,

Nə yaxşı ki, yaxşı-yaman evlər var.

Yağış yağır ürəyimi dərd alır,

Neçə-neçə damı daman evlər var.

Ağlayıram evsizlərin halına,

Min dərdinin biri bizlə bölünməz.

Çıxım bir az bu yağışda gəzişim,

İslanaram ağladığım bilinməz…

         Saleh Seyfullayev