Rumıniya və Moldovanın birləşməsi ilə bağlı qanun layihəsi növbəti mərhələyə keçdi
Rumıniya parlamentinin aşağı palatası olan Deputatlar Palatasında Rumıniya ilə Moldovanın birləşməsini nəzərdə tutan qanun layihəsi prosedur qaydalarına uyğun olaraq təsdiqlənmiş hesab edilib.
İLKİNxeber.az informasiya agentliyinin xarici mediaya istinadən verdiyi məlumata görə, təşəbbüs Avropa Parlamentinin deputatı Diana Şoşoaka tərəfindən irəli sürülüb. Layihə plenar iclasın gündəliyinə çıxarılmadığı və müəyyən olunmuş müddət ərzində rədd edilmədiyi üçün “səssiz qəbul” proseduru ilə təsdiqlənib.
Rumıniya qanunvericiliyinə əsasən, 45 gün ərzində müzakirəyə çıxarılmayan layihələr avtomatik olaraq növbəti mərhələyə keçir. Buna görə də sənəd artıq baxılması üçün parlamentin yuxarı palatası olan Senata göndərilib.
Qeyd edək ki, qanun layihəsinin qüvvəyə minməsi üçün Senat tərəfindən də təsdiqlənməsi tələb olunur.
Xatırladaq ki, Moldova Prezidenti Maya Sandu daha əvvəl ölkəsinin Rumıniya ilə daha sıx inteqrasiyasının Avropa İttifaqına üzvlük prosesini sürətləndirə biləcəyini bildirmişdi.
