Şuşa şəhərində Türk Dövlətləri Təşkilatına üzv ölkələrin dini məsələlər üzrə dövlət qurumları rəhbərlərinin birinci görüşü keçirilir.
İLKİNxeber.az xəbər verir ki, tədbirdə Türk Dövlətləri Təşkilatının Baş katibi, eləcə də Azərbaycan, Türkiyə, Qazaxıstan, Qırğızıstan və Özbəkistanın dini sahəyə məsul dövlət qurumlarının rəhbərləri iştirak edirlər.
Görüşün əsas məqsədi türk xalqlarının ortaq milli mənəvi və mədəni dəyərlərinin qorunması, həmçinin üzv ölkələrin aidiyyəti dövlət qurumları arasında əməkdaşlığın genişləndirilməsidir.
Toplantıda dövlət və din münasibətlərinin tənzimlənməsi, dini maarifləndirmə, qanunvericilik, idarəetmə sahəsində kadr hazırlığı, eləcə də qarşılıqlı təcrübə mübadiləsi ilə bağlı məsələlər müzakirə olunur.
Bununla yanaşı, türk xalqlarının ortaq dini və mədəni irsini əks etdirən tarixi abidələrin qorunması, bərpası və beynəlxalq səviyyədə tanıdılması, məzhəblərarası anlaşmanın, konfessiyalararası dialoqun və İslam həmrəyliyinin təşviqi, dini radikalizm və ekstremizmə qarşı birgə mübarizə istiqamətləri də gündəmdə yer alıb.
Toplantının əsas mövzularından biri Türk Dövlətləri Təşkilatı çərçivəsində dini məsələlər üzrə dövlət qurumları arasında daimi əməkdaşlıq mexanizminin yaradılmasıdır. Bu təşəbbüsün üzv ölkələr arasında koordinasiyanın gücləndirilməsinə və əməkdaşlığın institusional əsasda inkişafına töhfə verəcəyi bildirilir.
Tədbirdə Azərbaycanın Dini Qurumlarla İş üzrə Dövlət Komitəsinin sədri Ramin Məmmədov, Türk Dövlətləri Təşkilatının Baş katibi Kubanıçbek Omuralıyev, Qazaxıstanın Mədəniyyət və İnformasiya nazirinin müavini Rüstəm Əli, Qırğız Respublikasının Prezidenti yanında Dini Məsələlər və Millətlərarası Münasibətlər üzrə Milli Agentliyin sədri Talantbek Taşibekov, Türkiyə Diyanət İşləri İdarəsinin sədri Safi Arpaquş və Özbəkistanın Dini Məsələlər Komitəsinin sədri Sodik Toşboyev çıxış edəcəklər.
Görüşün yekununda tərəflərin razılaşdırılmış mövqeyini və gələcək əməkdaşlıq istiqamətlərini əks etdirən birgə bəyanatın imzalanması planlaşdırılır.
