ilkinxeber.az informasiya agentliyi xəbər verir ki, Bakıda taksi fəaliyyəti ilə məşğul olan 29 yaşlı Orxan Quliyev (ad və soyad şərtidir) tanış olduğu xanım sərnişini şantaj edib.
Məlumata görə, Orxan tanış olduğu, məktəb liseydə ingilis dili müəllimi işləyən Lalə (ad şərtidir) ilə münasibət qurub. Onların arasında əvvəl yaxın münasibət olub və hətta evlənmək qərarı da veriblər. Lakin sonradan münasibətləri pozulub.
İttihama əsasən, Orxan Lalədən 50 min manat pul tələb edib. Pulu verməyəcəyi halda isə telefonunda saxladığı şəxsi fotolarını yayacağı ilə hədələyib. Bildirilir ki, o, qadının işlədiyi liseyə gedərək direktorla görüşüb və birlikdə çəkdirdikləri qeyri etik fotoları göstərib.
İstintaq materiallarına görə, direktor ifadəsində Orxanın Lalə müəllimlə bağlı fotoları yayacağı ilə hədələdiyini bildirib. Bir müddət sonra həmin fotolar liseyin qaynar xətt nömrəsinə də göndərilib. Bundan sonra Lalə ərizə yazaraq işdən ayrılıb.
Zərərçəkmişin şikayətindən sonra Orxan Quliyev polis əməkdaşları tərəfindən saxlanılıb. Ona qarşı hədə qorxu ilə tələb etmə maddəsi ilə ittiham irəli sürülüb.
Lalə baş verənləri təsdiqləsə də, Orxan məhkəmədə özünü təqsirli bilməyib. O, ifadəsində qadından cəmi 100 manat borc istədiyini iddia edib.
Bakı Ağır Cinayətlər Məhkəməsinin hökmü ilə Orxan Quliyev (ad və soyad şərtidir) ittiham olunduğu maddə üzrə təqsirli bilinərək 6 il müddətinə azadlıqdan mə hrum edilib.
