Qızıl alqı-satqısı sahəsində fəaliyyət göstərdiyi bildirilən Elnarə Şirməmmədova (Səfərova) barəsində külli miqdarda dələduzluq ittihamı ilə cinayət işi üzrə istintaq başa çatıb.
ilkinxeber.az informasiya agentliyinin əldə etdiyi məlumata görə, təqsirləndirilən şəxs barəsində Cinayət Məcəlləsinin 178.3.2-ci (külli miqdarda dələduzluq) maddəsi ilə cinayət işi açılıb. Məhkəmənin qərarı ilə o, istintaq müddətində həbs qətimkan tədbiri ilə saxlanılıb.
İstintaq materiallarına əsasən, iş üzrə 9 nəfər zərərçəkmiş şəxs qismində tanınıb. İddia olunur ki, Elnarə Şirməmmədova müxtəlif şəxslərdən ümumilikdə 1 milyon 300 min manata yaxın vəsaiti alaraq geri qaytarmayıb. Cinayət işində zərərçəkənlərə müvafiq olaraq 27 min 120, 3 min 800, 21 min 300, 3 min 500, 467 min, 112 min, 428 min 790, 56 min 826 və 134 min 693 manat məbləğində maddi ziyanın dəydiyi qeyd edilir.
Zərərçəkmiş şəxslər bildirirlər ki, onlara vurulmuş ziyanın ödənilməsi istiqamətində indiyədək hər hansı addım atılmayıb. Onların sözlərinə görə, təqsirləndirilən şəxs yaxın qohumluq və dostluq münasibətlərindən istifadə edərək etibar qazanıb, böyük həcmdə qızıl məmulatları nümayiş etdirib, tanınmış qızıl ticarəti ilə məşğul olan şəxslərin və şirkətlərin adlarını hallandıraraq insanlarda etimad yaradıb. Şikayətçilər iddia edirlər ki, bu yolla vəsaitlər toplanıb və sonradan geri qaytarılmayıb.
Zərərçəkmişlər, həmçinin, bu əməllərin təkbaşına törədilmədiyini düşündüklərini bildirərək, Elnarə Şirməmmədovaya başqa şəxslərin də kömək etmiş ola biləcəyini iddia ediblər. Lakin bu iddialar istintaq və ya məhkəmə tərəfindən hələlik təsdiqini tapmayıb.
ilkinxeber.az informasiya agentliyinin əldə etdiyi digər məlumata görə, Səbail Rayon Polis İdarəsində aparılan ibtidai istintaq artıq yekunlaşıb və cinayət işi baxılması üçün Bakı Ağır Cinayətlər Məhkəməsinə göndərilib.
Bununla yanaşı, paytaxt sakini və qızıl biznesi ilə məşğul olan Zülfiyyə Quliyevanın da Elnarə Şirməmmədova barəsində Nəsimi Rayon Polis İdarəsinə müraciət etdiyi bildirilir. Şikayətdə ona qarşı 940 min manat məbləğində dələduzluq edildiyi iddia olunur. Həmin müraciət üzrə ayrıca araşdırma aparılır.
Elnarə Şirməmmədovanın atası, cənub bölgəsində tanınan müğənni İsmayıl Səfərov isə məsələ ilə bağlı açıqlamasında ittihamları qəbul etməyib. O bildirib ki, hazırda məhkəmə prosesi davam edir və qızının heç kimdən pul almadığını, səsləndirilən iddiaların həqiqəti əks etdirmədiyini deyib.
Qeyd edək ki, cinayət işi üzrə yekun hüquqi qiymət yalnız məhkəmənin qüvvəyə minmiş hökmü ilə müəyyən ediləcək.
