İlkinxeber.az informasiya agentliyi xəbər verir ki, Azərbaycan Respublikasının Prezidenti İlham Əliyev səhiyyə nazirinin yeni müavininin təyin olunması ilə bağlı Sərəncam imzalayıb.
Sərəncama əsasən, Rüfət Cahangir oğlu Hacıəlibəyov səhiyyə nazirinin müavini vəzifəsinə təyin edilib.
Rüfət Hacıəlibəyov 2022-ci ilin iyul ayından etibarən Səhiyyə Nazirliyində səhiyyənin rəqəmsallaşdırılması məsələləri üzrə nazirin müşaviri kimi fəaliyyət göstərib. O, uzun illər informasiya texnologiyaları və rəqəmsal transformasiya sahəsində çalışaraq bu istiqamətdə geniş təcrübə qazanıb.
30 ilə yaxın peşəkar fəaliyyəti ərzində HP, Microsoft və SAP kimi dünyanın aparıcı informasiya texnologiyaları şirkətlərinin Azərbaycandakı nümayəndəliklərinə rəhbərlik edən Rüfət Hacıəlibəyov, eyni zamanda, 2017-ci ildən Bakı Mühəndislik Universitetinin Himayəçilər Şurasının üzvüdür.
İnformasiya texnologiyalarının ölkədə inkişafına verdiyi töhfələr nəzərə alınaraq, o, 2021-ci ildə Prezidentin Sərəncamı ilə “Tərəqqi” medalı ilə təltif olunub.
Yeni təyinatın səhiyyə sistemində rəqəmsal idarəetmə və elektron səhiyyə xidmətlərinin inkişafına əlavə töhfə verəcəyi gözlənilir.
