İlkinxeber.az informasiya agentliyinin əldə etdiyi məlumata görə, Ukrayna ötən gecə Rusiya ərazisinə dron və raketlərdən istifadə etməklə genişmiqyaslı hava hücumu həyata keçirib.
Məlumata əsasən, hücumun əsas istiqamətlərindən biri Moskva və ətrafı olub. Rusiya paytaxtı istiqamətində yüzlərlə pilotsuz uçuş aparatının hərəkəti qeydə alınıb. Moskva meri Sergey Sobyanin bildirib ki, ümumilikdə 430 dronun uçuşu qeydə alınıb. Onun sözlərinə görə, hava hücumundan müdafiə qüvvələri dronların böyük hissəsini paytaxtdan uzaq məsafədə zərərsizləşdirib, Moskvaya yaxınlaşan 36 dron isə məhv edilib.
Hücumdan zərər görən bölgələrdən biri də Belqorod olub. Bildirilir ki, şəhərdə ardıcıl partlayışlar baş verib. Hücum zamanı Gazprom şirkətinə məxsus obyektlərdən birinə zərbə endirildiyi qeyd olunur.
Hadisədən sonra Belqorod şəhərində elektrik enerjisinin verilməsi dayandırılıb. Hücumun nəticələri və mümkün dağıntılarla bağlı araşdırmalar davam edir. Ukrayna tərəfi isə hadisə ilə bağlı hələlik rəsmi açıqlama verməyib
