2026-cı ilin hazırlıq planına əsasən, Quru Qoşunlarının rəhbərliyi altında hərbi hissələrin iştirakı ilə irimiqyaslı əməliyyat təlimi keçirilir.
İlkinxeber.az İnformasiya Agentliyi məlumat verir ki, bu barədə Müdafiə Nazirliyi açıqlama yayıb.
Məlumata görə, təlimə komando, motoatıcı, mexanikləşdirilmiş və artilleriya briqadalarının, təminat hərbi hissələrinin şəxsi heyəti, eləcə də səfərbərlik toplanışına cəlb olunan hərbi vəzifəlilər qatılıb.
Təlimin ilkin mərhələsində qoşunların döyüşə hazır vəziyyətə gətirilməsi, şəxsi heyət və texnikanın dəmir yolu vasitəsilə daşınması, hərbi hissələrin avtomobil yolları ilə uzaq məsafələrə, o cümlədən məhdudgörmə şəraitində hərəkəti həyata keçirilib. Həmçinin əməliyyat və döyüş təyinatı rayonları, bilavasitə müdafiə hədləri tutulub.
Təlim çərçivəsində müxtəlif təlim mərkəzləri və poliqonlarda hərbi hissələrlə döyüş atışlı taktiki və taktiki-xüsusi təlimlər keçirilib, döyüş atışları icra olunub, təminat tapşırıqları praktiki qaydada yerinə yetirilib.
Taktiki fəaliyyətlər Vətən müharibəsinin və son dövrlərdə dünyada baş verən silahlı münaqişələrin təcrübəsi nəzərə alınmaqla təşkil edilib. Təlimdə Azərbaycan Ordusunun arsenalında olan müasir pilotsuz uçuş aparatları, radioelektron mübarizə, radiotexniki kəşfiyyat vasitələri və yüksək dəqiqlikli silah sistemləri kompleks şəkildə tətbiq olunub.
Təlimin gedişində döyüş fəaliyyətlərinin yeni üsul və metodları sınaqdan keçirilib, komandirlərin müstəqil qərar qəbuletmə bacarıqları, şəxsi heyətin yüksək dağlıq, meşəlik ərazilərdə və yaşayış məntəqələrində döyüşaparma vərdişləri təkmilləşdirilib.
İrimiqyaslı əməliyyat təliminin gedişini izləyən Müdafiə Nazirliyinin rəhbər heyəti birləşmə və bölmələrin fəaliyyətini müsbət qiymətləndirib. Qarşıya qoyulan tapşırıqların tam həcmdə yerinə yetirildiyi və təlimin məqsədlərinə nail olunduğu bildirilib.
