Məktəbəqədər təhsil müəssisələrinə uşaqların qəbulu artıq “mygov” platforması üzərindən həyata keçirilir. Valideynlər övladlarını elektron qaydada növbəyə yazdırmaq və müraciətlərini rahat şəkildə idarə etmək imkanı əldə ediblər. Elektron sənəd qəbulu xidməti yalnız my.gov.az portalı vasitəsilə mümkündür.
İlkinxeber.az informasiya agentliyi məlumat verir ki, regional təhsil idarələrinin və Naxçıvan Muxtar Respublikasının tabeliyində olan məktəbəqədər təhsil müəssisələri üçün elektron növbələrin yaradılması prosesi iyulun 7-dən aktivləşdirilib.
Bakı şəhəri üzrə isə elektron növbələr mərhələli şəkildə istifadəyə verilir. Belə ki, 2021 və 2022-ci il təvəllüdlü uşaqlar üçün növbələr saat 11:00-da, 2023, 2024 və 2025-ci il təvəllüdlü uşaqlar üçün isə saat 15:00-da aktiv olacaq.
Qeyd edək ki, əvvəllər bq.edu.az sistemində uşağı hansı valideyn qeydiyyatdan keçiribsə, “mygov” platformasında da müraciət yalnız həmin valideynin şəxsi kabineti vasitəsilə aparılmalıdır. Uşaq hansı valideynin hesabına əlavə olunubsa, proses də həmin hesab üzərindən davam etdirilməlidir.
Xidmətdən istifadə üçün uşağın Azərbaycan Respublikası vətəndaşı olması və şəxsiyyət vəsiqəsinin mövcudluğu vacibdir. Əcnəbilər və vətəndaşlığı olmayan şəxslər üçün müvəqqəti və ya daimi yaşamaq icazəsi tələb olunur. Yaşayış icazəsi olmayan əcnəbilər isə BMT-nin Qaçqınlar üzrə Ali Komissarlığının himayə sənədini təqdim etməlidirlər.
Keçid mərhələsində sistemdə yalnız 2021-2025-ci illərdə anadan olmuş uşaqların məlumatları əks olunur və qeydiyyat mümkündür.
Valideynlər müraciət zamanı maksimum üç məktəbəqədər təhsil müəssisəsi seçə bilərlər. Seçilmiş bağçalardan birinə qəbul təsdiqləndikdə, digər növbələr avtomatik olaraq ləğv edilir.
Hazırda hər hansı bağçada qeydiyyatda olan uşaqlar üçün yenidən müraciət etməyə ehtiyac yoxdur. Lakin valideyn övladını başqa bağçaya köçürmək istədikdə, yeni müraciət edə bilər. Yeni bağçaya qəbul təsdiqləndikdən sonra isə prosesin tamamlanması üçün uşağın əvvəlki müəssisədən çıxarılması tələb olunur.
