Misir hakimiyyəti LGBTQ+ icmasına xidmət göstərən “Scarlet Lady” kruiz gəmisinin ölkənin ərazi sularına daxil olmasına icazə verməyib.
ilkinxeber.az informasiya agentliyi xəbər verir ki, bu barədə “The Guardian” nəşri məlumat yayıb.
Kruizi təşkil edən “Atlantis Events” şirkətinin açıqlamasına görə, göyərtəsində təxminən 2000 turistin olduğu layner Misir sularına daxil olmaq üçün icazə ala bilməyib. Bu səbəbdən İsgəndəriyyəyə planlaşdırılan səfər ləğv edilib.
Təşkilatçılar bildiriblər ki, ötən il eyni marşrut üzrə səfər heç bir problem olmadan həyata keçirilmişdi və Misir tərəfinin bu ilki qərarı onlar üçün gözlənilməz olub.
Hazırda Misir rəsmiləri tərəfindən məsələ ilə bağlı rəsmi açıqlama verilməyib.
Marşrut dəyişikliyindən sonra “Scarlet Lady” kruiz gəmisi Krit adasına istiqamət alacaq, daha sonra isə Monteneqronun Kotor limanına yollanacaq.
Qeyd edək ki, “Athens to Venice” kruizi iyulun 5-də start götürüb. Ötən həftə Türkiyə də gəminin öz limanlarına daxil olmasına icazə verməmişdi. Bundan sonra kruiz alternativ olaraq Misir və Yunanıstan istiqamətlərinə yönləndirilmişdi.
