“Ryanair” aviaşirkətinə məxsus təyyarədə Salonikidə yerləşən “Makedoniya” Beynəlxalq Hava Limanından qalxış zamanı ciddi insident baş verib.
İlkinxeber.az informasiya agentliyi xəbər verir ki, naməlum səbəbdən təyyarənin illüminatoru (pəncərəsi) qəfil sınıb. Hadisə nəticəsində pəncərə kənarında əyləşən sərnişin yarıya qədər təyyarədən çölə sovrulub və müxtəlif xəsarətlər alıb.
Məlumata görə, təyyarə Almaniyanın Memmingen şəhərinə istiqamət almışdı. Sərnişinlərin bildirdiyinə əsasən, qalxışdan bir neçə dəqiqə sonra, artıq hava məkanında olarkən güclü səs eşidilib və pəncərə qırılıb. 60 yaşlı yunan sərnişin demək olar ki, yarıya qədər çölə çıxsa da, ətrafda olan digər sərnişinlər və onun taxdığı təhlükəsizlik kəməri sayəsində o, içəridə saxlanılıb.
Hadisə zamanı təyyarədə panika yaşanıb, oksigen maskaları avtomatik açılıb. Pilotlar vəziyyəti nəzarətə alaraq təyyarəni yenidən Saloniki hava limanına qaytarıblar.
Xəsarət alan şəxs dərhal xəstəxanaya yerləşdirilib. Onun boyun nahiyəsində zədələr, müxtəlif sıyrıntılar və sınmış pəncərə ilə təmas nəticəsində yaranan yanıqlar qeydə alınıb. Digər sərnişinlərin əksəriyyəti xəsarət almayıb və sonradan başqa reyslə Almaniyaya yola salınıb.
İlkin ehtimallara görə, uçuş zamanı mühərrikdən qopan hissənin pəncərəyə dəyərək onu sındırması hadisəyə səbəb ola bilər. Faktla bağlı araşdırma aparılır.
