İlkinxeber.az informasiya agentliyi məlumat verir ki, Ukraynanın Odessa sahilləri yaxınlığında yerli vaxtla saat 15:15 radələrində Türkiyənin “Okean Maritime” şirkətinə məxsus “Atlas Bey” adlı mülki ticarət gəmisi dron hücumuna məruz qalıb.
Məlumat Azərbaycan Xarici İşlər Nazirliyinə istinadən yayılıb. Bildirilib ki, gəmidə olan ekipaj üzvlərindən 11-i Azərbaycan vətəndaşıdır. Kapitan istisna olmaqla, digər azərbaycanlı heyət üzvləri Odessa şəhərində sahilə çıxarılıb və onların vəziyyəti qənaətbəxş qiymətləndirilir.
Hazırda gəmi kapitanının axtarışları davam etdirilir. Azərbaycanın Ukraynadakı səfirliyi məsələ ilə bağlı aidiyyəti qurumlarla sıx əlaqədədir və vətəndaşlara zəruri konsulluq dəstəyinin göstərilməsi istiqamətində tədbirlər görülür.
