Putin və Paşinyanın görüşü ilə bağlı yekun qərar verilməyib

Rusiya Prezidenti Vladimir Putin ilə Ermənistanın Baş naziri Nikol Paşinyan arasında planlaşdırılan görüşün keçirilməsi ilə bağlı hələlik konkret razılıq əldə olunmayıb.
İLKİNxeber.az-ın Rusiya mətbuatına istinadən verdiyi məlumata görə, bunu Kremlin sözçüsü Dmitri Peskov açıqlayıb.
Peskov bildirib ki, Ermənistanda keçirilmiş parlament seçkilərinin yekun nəticələri hələ elan olunmayıb və bəzi siyasi qüvvələr səsvermənin nəticələrinə etiraz etməyə hazırlaşırlar. Onun sözlərinə görə, səslərin yenidən hesablanması prosesi vaxt tələb etdiyindən hazırkı mərhələdə Putin və Paşinyan arasında görüşlə bağlı dəqiq tarix müəyyən edilməyib.
Kreml nümayəndəsi qeyd edib ki, Nikol Paşinyan hazırda ölkə daxilindəki siyasi proseslərlə məşğuldur. Görüşün keçirilməsi məsələsinə isə seçki prosesinin yekun nəticələri məlum olduqdan sonra baxılacaq.
Xatırladaq ki, Paşinyan daha əvvəl parlament seçkilərindən sonra Moskvaya səfər etməyi və Rusiya Prezidenti Vladimir Putinlə görüşməyi planlaşdırdığını açıqlamışdı.
İyunun 7-də Ermənistanda keçirilən parlament seçkilərində 2 blok və 16 siyasi partiya iştirak edib. İlkin nəticələrə əsasən, Paşinyanın rəhbərlik etdiyi “Vətəndaş müqaviləsi” partiyası ən çox səs toplayaraq birinci olub. Seçkilərdə həmçinin iş adamı Samvel Karapetyanın rəhbərlik etdiyi “Güclü Ermənistan” bloku və keçmiş prezident Robert Köçəryanın “Ermənistan” bloku da iştirak edib.