İlkinxeber.az informasiya agentliyi xəbər verir ki, hadisə ötən gün saat 16 radələrində rayonun Təzəkənd kəndi ərazisində qeydə alınıb. Bərdə rayon sakini, 64 yaşlı Adil Əhmədov idarə etdiyi “Mercedes” markalı avtomobillə hərəkətdə olarkən əks istiqamətli zolağa çıxaraq, qarşıdan gələn Əzim Əhmədovun idarə etdiyi “DAF” markalı yük avtomobili ilə toqquşub.
Baş Dövlət Yol Polisi İdarəsindən verilən məlumata görə, qəza nəticəsində “Mercedes”in sürücüsü Adil Əhmədov və sərnişini – həyat yoldaşı Elza Əmirova hadisə yerində həyatlarını itiriblər. Yük avtomobilinin sürücüsü isə müxtəlif dərəcəli xəsarətlər alıb.
İlkin araşdırmalara əsasən, qəzanın baş verməsinə “Mercedes” markalı avtomobilin sürücüsünün sükan arxasında yuxulamasının səbəb olduğu ehtimal edilir.
Baş Dövlət Yol Polisi İdarəsi sürücülərə müraciət edərək bildirib ki, xüsusilə isti hava şəraitində yorğun və yuxusuz halda sükan arxasına əyləşmək ağır yol-nəqliyyat hadisələrinə səbəb olur. Bu baxımdan, sürücülərə günün sərin saatlarında yola çıxmaq, uzun məsafələr zamanı qısa fasilələrlə istirahət etmək tövsiyə olunur.
