İlkinxeber.az informasiya agentliyi xəbər verir ki, iyulun 5-də keçirilmiş qəbul imtahanında II və III ixtisas qrupları üzrə dörd abituriyent maksimal – 400 bal toplayıb.
Dövlət İmtahan Mərkəzinin yaydığı məlumata görə, II ixtisas qrupu üzrə ən yüksək nəticəni Laçın rayon Oğuz tam orta məktəbinin məzunu İsbəndiyarlı Paşa Araz oğlu əldə edib. O, imtahanın birinci mərhələsində 277.3 bal toplayıb.
Hər iki mərhələnin cəminə əsasən II ixtisas qrupu üzrə ən yüksək nəticə isə 690 bal ilə Sumqayıt şəhər 35 saylı orta məktəbin məzunu Kərimov Zamin Ramin oğluna məxsusdur. O, birinci mərhələdə 297.5, ikinci mərhələdə isə 392.5 bal toplayıb.
III ixtisas qrupu üzrə isə üç abituriyent – Sumqayıt şəhəri Təbiət Elmləri Təmayüllü Gimnaziyanın məzunu Məmmədzadə Əli Musa oğlu, Şəmkir rayonu Kür qəsəbə orta məktəbinin məzunu Məmmədova Aydan İxtiyar qızı və Abşeron rayonu Saray qəsəbə 1 saylı məktəbin məzunu Mənsimli Orxan Zaur oğlu imtahanda 400 bal nəticə göstəriblər.
Onlardan Məmmədova Aydan İxtiyar qızı birinci mərhələdə 279.6, Mənsimli Orxan Zaur oğlu isə 276.1 bal toplayıb. Məmmədzadə Əli Musa oğlu isə hər iki mərhələnin cəminə görə 689.6 bal nəticə ilə III ixtisas qrupu üzrə ən yüksək göstəriciyə nail olub. O, birinci mərhələdə 289.6 bal toplayıb.
Qeyd edək ki, qəbul imtahanının birinci mərhələsində maksimum 300, ikinci mərhələsində isə 400 bal toplamaq mümkündür. Ümumi nəticə hər iki mərhələnin cəminə əsasən müəyyən edilir.
