Rusiya Dövlət Duması ödənilməmiş və ya götürülməmiş məhkumluğu olan xarici vətəndaşlar və vətəndaşlığı olmayan şəxslərlə bağlı yeni qanun layihəsini ikinci və üçüncü oxunuşda qəbul edib.
ilkinxeber.az informasiya agentliyinin əldə etdiyi məlumata görə, yeni qaydalara əsasən, həm Rusiya ərazisində, həm də digər ölkələrdə məhkum edilmiş şəxslərə Rusiya vətəndaşlığının, daimi və müvəqqəti yaşamaq icazəsinin verilməsi qadağan olunacaq.
Qanuna əsasən, cinayətin ağırlıq dərəcəsindən asılı olmayaraq, qüvvədə olan məhkumluq vətəndaşlıq üçün müraciətin rədd edilməsinə, həmçinin daimi və ya müvəqqəti yaşamaq icazəsinin verilməsindən imtinaya və ya əvvəllər verilmiş icazələrin ləğvinə əsas yarada bilər.
Bundan əlavə, 14 yaşdan yuxarı xarici vətəndaşlar yaşayış və ya müvəqqəti yaşamaq icazəsi üçün müraciət edərkən məhkumluğun olmaması barədə arayış və ya törədilmiş cinayət barədə məlumatı əks etdirən rəsmi sənəd təqdim etməlidirlər. Həmin sənəd ərizəçinin vətəndaşı olduğu ölkənin səlahiyyətli qurumu tərəfindən ən çoxu üç ay əvvəl verilməlidir.
Yeni tələblər 14 yaşınadək uşaqlara, qaçqınlara, Rusiyada siyasi və ya müvəqqəti sığınacaq almış şəxslərə, Rusiya Silahlı Qüvvələrində müqavilə əsasında hərbi xidmət keçən və ya keçmiş xarici vətəndaşlara, eləcə də əvvəllər bu sənədi təqdim etmiş yaşayış icazəsi sahiblərinə şamil edilməyəcək.
Qanunda Ukrayna vətəndaşları üçün iki illik keçid dövrü də nəzərdə tutulub. Bu müddət ərzində onlar Rusiya dövlət orqanlarına müraciət edərkən məhkumluğun olmaması barədə arayış təqdim etməkdən azad ediləcəklər.
