İspaniya yay mövsümünün üçüncü və ən güclü isti hava dalğası ilə üz-üzədir. ilkinxeber.az informasiya agentliyinin məlumatına əsasən, ölkə ərazisində Afrikadan daxil olan isti və quru hava kütlələri yaxın günlərdə temperaturun rekord həddə yüksəlməsinə səbəb olacaq.
İspaniya Dövlət Meteorologiya Agentliyinin (AEMET) yaydığı məlumata əsasən, “istilik günbəzi” adlandırılan atmosfer hadisəsi həftə ərzində ölkənin böyük hissəsində təsirini saxlayacaq. Bu səbəbdən bir sıra bölgələrdə temperaturun 47 dərəcəyə yaxınlaşacağı proqnozlaşdırılır.
Mütəxəssislərin hesablamalarına görə, Malaqada havanın temperaturu 45 dərəcəyə, ölkənin cənub ərazilərində 44 dərəcəyə, Kataloniyada isə 42 dərəcəyə qədər yüksələcək. Sinoptiklər əhalini günün ən isti saatlarında açıq havada uzun müddət qalmamağa və təhlükəsizlik qaydalarına əməl etməyə çağırırlar.
Qızmar hava meşə yanğınları təhlükəsini də ciddi şəkildə artırıb. Son məlumatlara görə, təkcə bazar ertəsi ölkə üzrə 26 min hektardan artıq ərazi alovun təsirinə məruz qalıb. Bedar yaxınlığında baş vermiş meşə yanğını nəticəsində 13 nəfər həyatını itirib.
Xatırladaq ki, İspaniyada indiyədək qeydə alınmış ən yüksək temperatur 2021-ci il avqustun 14-də Qvadalkvivir hövzəsində ölçülüb. Həmin gün termometrlər 47,6 dərəcə Selsi göstərərək ölkə tarixinin ən yüksək göstəricisini qeydə almışdı.
