Baş prokuror Kamran Əliyev Azərbaycanda işgüzar səfərdə olan Türkiyənin ədliyyə naziri Akın Gürleklə görüş keçirib.
ilkinxeber.az xəbər verir ki, görüşdə Azərbaycan ilə Türkiyə arasında strateji müttəfiqlik və qardaşlıq münasibətlərinin Ulu Öndər Heydər Əliyevin irəli sürdüyü “Bir millət, iki dövlət” prinsipinə əsaslandığı, bu münasibətlərin Prezident İlham Əliyev və Türkiyə Prezidenti Rəcəb Tayyib Ərdoğan arasında mövcud olan səmimi dostluq, qarşılıqlı etimad və siyasi iradə sayəsində bütün istiqamətlər üzrə uğurla inkişaf etdiyi vurğulanıb.
Bildirilib ki, iki ölkə arasında yüksək səviyyəli əlaqələr hüquq sahəsində əməkdaşlığın da genişlənməsinə şərait yaradıb. Bu çərçivədə prokurorluq, ədliyyə və digər hüquq mühafizə orqanları arasında qarşılıqlı fəaliyyətin möhkəmləndirilməsi, hüquqi yardım mexanizmlərinin təkmilləşdirilməsi, transmilli cinayətkarlıqla mübarizədə birgə səylərin artırılması və beynəlxalq hüquqi əməkdaşlığın inkişafı xüsusi qeyd olunub.
Kamran Əliyev Akın Gürlekin rəhbərlik etdiyi nümayəndə heyətinin ötən il Bakıya işgüzar səfərini, eləcə də Azərbaycan Baş Prokurorluğunun nümayəndə heyətinin bu ilin fevral ayında İstanbula səfəri zamanı keçirilən görüşləri məmnunluqla xatırladaraq, həmin təmasların əməkdaşlığın daha da genişlənməsinə mühüm töhfə verdiyini bildirib.
Baş prokuror prokurorluq və ədliyyə orqanları arasında qarşılıqlı etimada əsaslanan münasibətlərin yüksək səviyyədə olduğunu, bu əməkdaşlığın gələcəkdə də uğurla davam edəcəyinə inandığını ifadə edib.
Akın Gürlek isə qəbula görə təşəkkür edərək, Azərbaycan ilə Türkiyə arasında bütün sahələrdə, xüsusilə prokurorluq, məhkəmə və ədliyyə istiqamətlərində əməkdaşlığın nümunəvi səviyyədə olduğunu bildirib. O qeyd edib ki, həyata keçirilən birgə fəaliyyət hər iki ölkənin hüquq sisteminin inkişafına və hüquqi əlaqələrin daha da möhkəmlənməsinə mühüm töhfə verir.
Görüş zamanı hüquqi əməkdaşlığın aktual istiqamətləri və gələcək inkişaf perspektivləri müzakirə olunub, iki qardaş ölkə arasında strateji müttəfiqliyin qarşılıqlı etimad və dəstək əsasında bundan sonra da inkişaf etdiriləcəyinə əminlik ifadə edilib.
Görüşdə Türkiyənin Azərbaycandakı fövqəladə və səlahiyyətli səfiri Birol Akgün də iştirak edib.
