ilkinxeber.az informasiya agentliyi xəbər verir ki, hadisə ilə bağlı məlumat sosial şəbəkələrdə yayılıb. İddialara görə, 17 yaşlı oğlan uzun müddət anası tərəfindən ağır şəraitdə saxlanılıb, zəncirlənib və təhsildən kənarda qalıb.
Daxili İşlər Nazirliyinin Mətbuat Xidmətinin əməkdaşı bildirib ki, məsələ ilə bağlı ərazi üzrə polis orqanında araşdırma aparılır. Yeniyetmə ilkin tibbi müayinədən keçirilməsi və təhlükəsizliyinin təmin olunması məqsədilə polis əməkdaşları tərəfindən xəstəxanaya yerləşdirilib.
Bununla yanaşı, ananın narkoloji və psixoloji vəziyyətinin qiymətləndirilməsi istiqamətində də tədbirlər görülür. Araşdırmanın nəticəsinə əsasən hüquqi qiymət veriləcək.
Sosial Xidmətlər Agentliyindən isə bildirilib ki, məlumat daxil olan kimi qurumun əməkdaşları prosesə cəlb olunub və yeniyetmənin vəziyyəti yerində qiymətləndirilib. Aidiyyəti qurumlarla birgə həyata keçirilən tədbirlər nəticəsində o, müvafiq tibb müəssisəsinə yerləşdirilib.
Qeyd olunub ki, müayinə və qiymətləndirmə prosedurları başa çatdıqdan sonra yeniyetmə daimi qayğı ilə təmin edilməsi üçün qanunvericiliyə uyğun olaraq uyğun uşaq müəssisəsinə yerləşdiriləcək.
