Külli miqdarda qanunsuz narkotik dövriyyəsində ittiham olunan “Kəpəz Hospital”ın cərrahı Elşən Əliyevin cinayət işi üzrə məhkəmə araşdırması yekunlaşıb.
İlkinxeber.az informasiya agentliyinin əldə etdiyi məlumata görə, məhkəmə istintaqı zamanı təqsirləndirilən şəxsə qarşı irəli sürülmüş ittihamlar tam sübuta yetirilib.
İş materiallarına əsasən, Elşən Əliyevin daha əvvəl də narkotiklərlə bağlı cinayətə görə məhkum olunduğu, lakin həmin məhkumluğun hələ tam ödənilmədiyi müəyyən edilib. O, sonuncu dəfə polis əməkdaşları tərəfindən “Opera Hotel”də saxlanılıb. Hotel otağına baxış zamanı müxtəlif növ narkotik vasitələr aşkarlanıb.
Məhkəmə prosesində cərrah özünü təqsirli bilmədiyini bildirib. O, əvvəlki dövrdə narkotik istifadə etdiyini etiraf etsə də, həbsdən çıxdıqdan sonra bu vərdişdən uzaqlaşdığını qeyd edib. Elşən Əliyev saxlanıldığı gün hoteldə qalmasını isə Səhiyyə Nazirliyi tərəfindən təşkil edilən imtahana hazırlaşmaqla izah edib.
Buna baxmayaraq, toplanmış sübutlar və şahid ifadələri əsasında onun mütəşəkkil dəstə tərkibində narkotik vasitələrin satışı ilə məşğul olduğu təsdiqlənib. Məhkəmənin hökmü ilə Elşən Əliyev 9 il müddətinə azadlıqdan məhrum edilib.
Qeyd edək ki, ürək-damar cərrahı olan Elşən Əliyev daha əvvəl “Lazur Hospital”, “Real Hospital” və “Alo Doktor” kimi özəl tibb müəssisələrində fəaliyyət göstərib.
