Daxili İşlər Nazirliyinin (DİN) Baş Mütəşəkkil Cinayətkarlıqla Mübarizə İdarəsi kənd təsərrüfatının inkişafı adı altında dövlətə məxsus “Aqrarkredit” QSC-dən 100 milyon manatdan artıq kredit götürülməsi ilə bağlı cinayət faktlarının ifşasını davam etdirir.
ilkinxeber.az informasiya agentliyinin əldə etdiyi məlumata görə, sözügedən iş üzrə daha bir nəfər saxlanılıb. Saxlanılan şəxs Yaqubov Vüqar Hacı oğludur. O, “Aqrarkredit”də Kreditlərin təşkili və idarə edilməsi departamentinin müdiri vəzifəsində çalışıb.
İstintaq materiallarına əsasən, Vüqar Yaqubov bir qrup sahibkarla əlbir olaraq 24 milyon manat məbləğində vəsaiti kredit rəsmiləşdirilməsi adı altında mənimsəyib. Həmin vəsaitlərin kənd təsərrüfatının inkişafına yönəldilməsi əvəzinə şəxsi ehtiyaclara və digər məqsədlərə sərf olunduğu bildirilir.
Ona qarşı Cinayət Məcəlləsinin 178.4-cü (xüsusilə külli miqdarda dələduzluq) maddəsi ilə ittiham irəli sürülüb. Məhkəmənin qərarı ilə Vüqar Yaqubov barəsində 4 ay müddətinə həbs qətimkan tədbiri seçilib.
Qeyd olunur ki, dövlətə dəymiş zərər ödənilmədiyi təqdirdə, bu maddə ilə təqsirli bilinən şəxsi 10 ildən 14 ilədək azadlıqdan məhrumetmə cəzası gözləyir.
Hazırda faktla bağlı Baş Mütəşəkkil Cinayətkarlıqla Mübarizə İdarəsində genişmiqyaslı istintaq tədbirləri davam etdirilir. Bu iş üzrə digər şəxslərin də məsuliyyətə cəlb olunacağı istisna edilmir.
Məlumata görə, Vüqar Yaqubovun qanunsuz fəaliyyəti 2019–2025-ci illəri əhatə edib və o, 2025-ci ilə qədər həmin vəzifədə çalışıb.
