ABŞ Prezidenti Donald Tramp Nyu-Cersidə yerləşən qolf klubunda oynayarkən ərazidə “Avenger” qısa mənzilli hava hücumundan müdafiə sisteminin yerləşdirildiyi görüntülənib.
İlkinxeber.az informasiya agentliyi məlumat verir ki, bu barədə xarici media məlumat yayıb. Görüntülərdə AN/TWQ-1 “Avenger” sistemi ilə yanaşı, AN/MPQ-64 “Sentinel” radarının da ərazidə olduğu bildirilir.
Məlumata görə, “Sentinel” radarı aşağı hündürlükdə uçan təyyarə və helikopterlər, qanadlı raketlər və dronlar kimi hava obyektlərini aşkarlayıb izləyə bilir. “Avenger” sistemi isə hava təhdidlərinə qarşı “Stinger” raketlərindən istifadə etmək imkanına malikdir.
Trampın qolf oynadığı ərazi yaxınlığında təhlükəsizlik tədbirlərinin gücləndirilməsi ABŞ prezidentinin mühafizəsi ilə bağlı tətbiq olunan əlavə tədbirlərin bir hissəsi kimi qiymətləndirilir.
Qeyd edək ki, son günlər Trampın Nyu-Cersidəki qolf klubunun üzərində uçuş məhdudiyyətləri də tətbiq olunub və məhdudlaşdırılmış hava məkanına daxil olan mülki təyyarələri müşayiət etmək üçün F-16 qırıcıları havaya qaldırılıb.
