Müğənni Murad Arif məktəb attestatlarının elektron formada təqdim olunması ilə bağlı qarşılaşdığı problemlə əlaqədar sosial şəbəkə hesablarında paylaşım edib.
İlkinxeber.az informasiya agentliyi məlumat verir ki, sənətçi Elm və Təhsil Nazirliyinə müraciətində yeni qaydalara əsasən attestatların elektron formada, PDF şəklində təqdim edildiyini, lakin həmin sənədlərin apostil olunması ilə bağlı çətinlik yaşadığını bildirib.
Murad Arif qeyd edib ki, övladının xaricdə təhsil alması üçün sənədlərin rəsmiləşdirilməsi zamanı bu məsələ ciddi problem yaradıb.
Məsələ ilə bağlı Məktəbəqədər və Ümumi Təhsil üzrə Dövlət Agentliyindən bildirilib ki, attestatlar təhsil müəssisəsinin rəhbəri tərəfindən elektron imza ilə imzalandığı üçün hüquqi qüvvəyə malik rəsmi təhsil sənədləridir.
Qurumun açıqlamasında qeyd olunub ki, 11 avqust 2026-cı il tarixindən etibarən ümumi təhsil müəssisələrinin rəhbərləri tərəfindən elektron imza ilə imzalanmış təhsil haqqında dövlət sənədləri – attestatlar vətəndaşlar üçün elektron formada əlçatan olub.
Bildirilib ki, elektron formada təqdim edilən attestatlar rəsmi təhsil sənədi statusuna malikdir.
