İlkinxeber.az informasiya agentliyi məlumat verir ki, Türkiyənin Karabük vilayətinin Safranbolu rayonunda 21 yaşlı İşık T. sevgilisi ilə mübahisə etdikdən sonra 4-cü mərtəbədə yerləşən mənzilin eyvanından təxminən 20 metr hündürlükdən yıxılıb.
Hadisə nəticəsində ağır xəsarətlər alan gənc qız əvvəlcə kafeyə məxsus tentin üzərinə düşüb, daha sonra yerə çırpılıb. Tentin düşmə sürətini azaltmasının onun həyatını xilas etdiyi bildirilir.
Hadisə yerinə təcili tibbi yardım və polis əməkdaşları cəlb olunub. İlk tibbi yardım göstərildikdən sonra İşık T. xəstəxanaya çatdırılıb. Onun müalicəsi davam edir.
Polis hadisənin başvermə səbəblərini araşdırır. Gənc qızın müvazinətini itirərək yıxılması, intihara cəhd etməsi və ya sevgilisi tərəfindən itələnməsi ehtimalları araşdırılır. Hadisədən əvvəl tərəflər arasında baş verən mübahisənin səbəbləri də müəyyənləşdirilir.
Ərazidəki təhlükəsizlik kameralarının görüntüləri araşdırmaya cəlb olunub.
Qeyd olunur ki, İşık T.-nin Azərbaycan vətəndaşı olan 25 yaşlı sevgilisi Fikrət Z. polis tərəfindən saxlanılıb. Araşdırma davam etdirilir.
