Müdafiə Nazirliyinin Mərkəzi Hərbi Həkim Komissiyasının sabiq rəisi Rasim Həsənovun cinayət işi üzrə məhkəmə prosesi yekunlaşıb.
İlkinxeber.az informasiya agentliyinin məlumatına görə, Bakı Hərbi Məhkəməsində hakim Anar Rzayevin sədrliyi ilə keçirilən iclasda hökm elan olunub.
Hökmə əsasən, Rasim Həsənova verilmiş ittihamların hüquqi tövsifi dəyişdirilərək əməli Cinayət Məcəlləsinin 178.3.2-ci maddəsi ilə, yəni külli miqdarda ziyan vurmaqla dələduzluq kimi qiymətləndirilib.
Məhkəmənin qərarı ilə Rasim Həsənova 15 min manat məbləğində cərimə cəzası təyin edilib və o, məhkəmə zalından azadlığa buraxılıb.
İbtidai istintaq zamanı müəyyən edilib ki, Rasim Həsənov 2021–2025-ci illərdə vəzifədə olduğu müddətdə ona müraciət edən hərbi qulluqçuların şəhadətləndirilərək tərxis olunmaları üçün ayrı-ayrı şəxslərdən müxtəlif məbləğlərdə pul vəsaitləri alıb. Həmçinin onun vəzifə saxtakarlığı törətməsinə dair əsaslı şübhələr müəyyən olunub.
İstintaqın topladığı sübutlar əsasında Həsənova Cinayət Məcəlləsinin 311.3.2, 311.3.3, 313 və 341.2.3-cü maddələri ilə ittiham elan edilmiş, məhkəmənin qərarı ilə barəsində həbs qətimkan tədbiri seçilmişdi.
Məhkəmə araşdırmasının yekununda isə əməlin hüquqi tövsifi dəyişdirilib və 15 min manat cərimə cəzası tətbiq olunub.
