Ötən ilin noyabr ayında Gəncə-Şəmkir yolunun Göygöl ərazisindən keçən hissəsində baş vermiş ağır yol-nəqliyyat hadisəsi ilə bağlı açılmış cinayət işi üzrə məhkəmə prosesi yekunlaşıb.
İlkinxeber.az informasiya agentliyi xəbər verir ki, Gəncə Ağır Cinayətlər Məhkəməsində qəza zamanı “Mercedes GL 550” markalı avtomobili idarə edən 21 yaşlı G.Kərimova barəsində hökm oxunub.
İlkin məlumatlarda avtomobili 1990-cı il təvəllüdlü Əhliman Abdi idarə etdiyi bildirilsə də, aparılan araşdırmalar zamanı bunun doğru olmadığı müəyyən edilib.
İstintaqla məlum olub ki, hadisə günü Əhliman Abdi, hərbi xidmətdən qısa müddətli məzuniyyətə buraxılmış 2007-ci il təvəllüdlü Hikmət Vəlizadə və digər tanışları ilə birlikdə Gəncədə yerləşən “Karizma” restoranında olublar. Daha sonra onlar digər tanış qadınları da məclisə dəvət edərək spirtli içki qəbul ediblər.
Gecə saat 02:00 radələrində restoranı tərk edən zaman sərxoş vəziyyətdə olan Əhliman avtomobili idarə etməyi G.Kərimovaya həvalə edib. O, ön sərnişin oturacağında əyləşib, Hikmət və digər sərnişinlər isə arxa oturacaqda yer alıblar.
Yolda hərəkət zamanı avtomobillər arasında təhlükəli ötüşmə manevrləri edilib. Nəticədə idarəetmədən çıxan “Mercedes” yol kənarındakı divara çırpılıb. Qəza nəticəsində Əhliman Abdi və Hikmət Vəlizadə hadisə yerində həyatlarını itiriblər.
Hadisə zamanı yaralanan sərnişinlərin ifadəsinə görə, Əhliman sürücüdən digər avtomobili keçməyi tələb edib və hətta sükan idarəsinə müdaxilə edib. Bu isə qəzanın baş verməsinə səbəb olub.
Məhkəmə araşdırması zamanı məlum olub ki, G.Kərimovanın sürücülük hüququ olmayıb. Onun azyaşlı – 2023-cü il təvəllüdlü bir övladının olduğu da qeyd edilib.
Gəncə Ağır Cinayətlər Məhkəməsinin hökmü ilə G.Kərimova 7 il 6 ay müddətinə azadlıqdan məhrum edilib və məhkəmə zalında həbs olunub.
