Kəlbəcər məktəbinin ilk məzunu tələbə oldu

İşğaldan azad olunmuş Kəlbəcər şəhərində fəaliyyət göstərən ilk təhsil müəssisəsi olan Kəlbəcər şəhəri Bəhmən Cəfərov adına 1 nömrəli tam orta ümumtəhsil məktəbinin ilk və yeganə məzunu Atakişiyeva Nəzrin Seyfəddin qızı tələbə adını qazanıb.
ilkinxeber.az informasiya agentliyi xəbər verir ki, bu barədə Məktəbəqədər və Ümumi Təhsil üzrə Dövlət Agentliyinin İctimaiyyətlə əlaqələr sektorunun müdiri Zenfira Sevdimalı məlumat yayıb.
Bildirilib ki, Nəzrin Atakişiyeva Gəncə Dövlət Universitetinin Filologiya fakültəsinin Azərbaycan dili və ədəbiyyatı ixtisasına qəbul olunub.
Beləliklə, Kəlbəcər şəhərində təhsil ənənəsinin yenidən qurulmasının simvoluna çevrilən məktəbin ilk və yeganə məzunu ali məktəbə qəbul olaraq tələbə həyatına başlayacaq.