Prezident İlham Əliyev “Daşınmaz əmlakın dövlət kadastrının aparılması qaydaları”nın təsdiq edilməsi ilə bağlı Fərman imzalayıb.
ilkinxeber.az informasiya agentliyi xəbər verir ki, yeni qaydalar “Daşınmaz əmlakın dövlət kadastrı, torpaqların monitorinqi və yerquruluşu haqqında” Qanunun müvafiq maddəsinə əsasən hazırlanıb və kadastr sahəsində yaranan münasibətləri tənzimləyir.
Sənədə əsasən, daşınmaz əmlakın kadastr uçotuna alınması həmin əmlakın kəmiyyət və keyfiyyət göstəricilərinin dövlət kadastrına daxil edilməsi yolu ilə onun mövcudluğunun dövlət tərəfindən müəyyənləşdirilməsini nəzərdə tutur.
Dövlət kadastrı Azərbaycan Respublikasının mülkiyyətidir. Kadastrın aparılması İqtisadiyyat Nazirliyi yanında Əmlak Məsələləri Dövlət Xidməti tərəfindən “Daşınmaz Əmlakın Elektron Reyestri və Kadastrı” informasiya sistemi vasitəsilə həyata keçiriləcək.
Bununla yanaşı, daşınmaz əmlaka dair sahəvi kadastrlarda mövcud olan məlumatlar Elektron Hökumət İnformasiya Sistemi vasitəsilə dövlət kadastrına inteqrasiya ediləcək.
Qaydalara görə, dövlət kadastrı qanunvericilikdə müəyyən edilmiş prinsiplər əsasında tərtib olunacaq və aparılacaq. Sənəddə istifadə olunan anlayışlar isə müvafiq qanun və digər normativ hüquqi aktlarda müəyyən edilmiş mənaları ifadə edir.
