Azərbaycanlı qızlar təbiət elmləri, oxu və riyazi savadlılıq üzrə oğlanlardan daha yüksək nəticə göstəriblər.
ilkinxeber.az informasiya agentliyi xəbər verir ki, bunu elm və təhsil naziri Emin Əmrullayev PISA 2025 tədqiqatının nəticələrinə həsr olunan mətbuat konfransında açıqlayıb.
Nazirin sözlərinə görə, təbiət elmləri üzrə qızlar 416, oğlanlar isə 402 bal toplayıb. Oxu savadlılığında fərq daha böyük olub. Qızların göstəricisi 392, oğlanların nəticəsi isə 356 bal təşkil edib. Beləliklə, qızlar oğlanları 36 bal qabaqlayıb.
Riyazi savadlılıq üzrə də qızlar ilk dəfə oğlanları üstələyib. Bu istiqamətdə qızlar 423, oğlanlar isə 422 bal toplayıb. Əvvəlki qiymətləndirmələrdə isə riyaziyyat üzrə oğlanların üstünlüyü müşahidə olunub.
Emin Əmrullayev bildirib ki, qızların oxu savadlılığı üzrə nəticələri oğlanlardan yüksək olsa da, bu göstəricilər hələ də baza səviyyəsinin altındadır. Bu səbəbdən oxu savadlılığının inkişafına xüsusi diqqət yetirilməlidir.
Nazir nəticələrdə oğlanlarla qızlar arasındakı fərqin səbəblərinin geniş təhlil edilməsinin vacibliyini vurğulayıb. Onun sözlərinə görə, məsələyə yalnız təhsil sistemi deyil, valideynlər və cəmiyyətin məsuliyyəti baxımından da yanaşmaq lazımdır.
Emin Əmrullayev həmçinin qeyd edib ki, PISA nəticələrinə əsasən, oxu savadlılığı üzrə Bakı şəhəri 56-cı yerdə qərarlaşıb.
