Uşaq evindən çıxan gənclərə 6000 manat veriləcək

İlkinxeber.az informasiya agentliyi məlumat verir ki, bu il uşaq evlərindən 28 gənc ali və orta ixtisas təhsili müəssisələrinə qəbul olunub.
Ali məktəbə qəbul gənclərin həyatında mühüm mərhələ olsa da, xüsusilə valideyn və yaxınlarının dəstəyindən məhrum olan şəxslər üçün təhsil, yaşayış, maddi təminat, psixoloji adaptasiya və gələcək məşğulluq məsələləri əlavə çətinliklər yarada bilər.
Məsələ ilə bağlı Əmək və Əhalinin Sosial Müdafiəsi Nazirliyinin tabeliyində fəaliyyət göstərən Sosial Xidmətlər Agentliyindən bildirilib ki, valideyn himayəsindən məhrum olmuş uşaqlar həyatlarının müxtəlif mərhələlərində dövlət qayğısı ilə əhatə olunurlar. Onlara sosial, psixoloji, məişət, pedaqoji və digər xidmətlər göstərilir.
Qeyd edilib ki, dövlət dəstəyi yalnız uşaqların uşaq evlərində olduğu dövrlə məhdudlaşmır. Valideyn himayəsindən məhrum olmuş və ali, orta ixtisas və ya peşə təhsili müəssisələrində əyani formada təhsil alan 23 yaşınadək şəxslər təhsil müddətində də müvafiq qayğı ilə təmin edilirlər.
Gənclərin yeni həyata uyğunlaşması, təhsillərini davam etdirməsi, məşğulluğunun təmin olunması və sosial məsələlərinin həlli istiqamətində müəssisələrdə çalışan sosial işçilər və psixoloqlar tərəfindən dəstək göstərilir.
Bundan əlavə, qanunvericiliyə əsasən, valideyn himayəsindən məhrum olmuş şəxslər ilk dəfə işə düzəldikdə dövlət tərəfindən 6000 manat məbləğində birdəfəlik müavinət alırlar.
Beləliklə, uşaq evlərindən çıxaraq təhsilini davam etdirən gənclərin müstəqil həyata keçid dövründə qarşılaşa biləcəkləri sosial, məişət və digər çətinliklərin aradan qaldırılması üçün dövlət dəstəyi davam etdirilir.