İranın cənub-şərqində silahlı qruplaşmalara qarşı əməliyyatlar gücləndirilib

İlkinxeber.az informasiya agentliyi məlumat verir ki, İranın cənub-şərqində silahlı qruplaşmalara qarşı mübarizə tədbirləri intensivləşdirilib. Rəsmi məlumatlara görə, bəzi silahlılar zərərsizləşdirilib, ölənlər də var. Qruplaşmaların mövqelərinin möhkəmləndiyi ərazilərə zərbələr endirildiyi bildirilir.
İran tərəfi sözügedən silahlı dəstələrin ABŞ və İsrail tərəfindən maliyyələşdirildiyini iddia edir. Rəsmi açıqlamada qruplaşmaların döyüş meydanında təzyiqlə üzləşdikləri üçün informasiya müharibəsinə əl atdıqları irəli sürülüb.
Daha əvvəl İran parlamentinin Milli Təhlükəsizlik və Xarici Siyasət Komissiyasının sədri İbrahim Əzizi ölkənin cənub-şərqindəki vəziyyətin hibrid müharibə xarakteri aldığını açıqlayıb. Onun sözlərinə görə, ABŞ və bəzi region ölkələrinin silahlı qruplaşmalara dəstəyini təsdiqlədiyi iddia edilən sənədlər əldə olunub.
İ. Əzizi təhlükəsizlik problemlərinin aradan qaldırılacağını vurğulayaraq, İranın şərq sərhədinin tam bağlanması məsələsinin prioritet olduğunu bildirib. O, hökuməti bu istiqamətdə təsdiqlənmiş maliyyə vəsaitlərindən istifadə etməklə tədbirləri təcili həyata keçirməyə çağırıb.
Qeyd edək ki, ABŞ və İsrailin silahlı qruplaşmalara dəstəyi ilə bağlı iddialar İran rəsmilərinin açıqlamalarına əsaslanır.