Davam edən Rusiya-Ukrayna müharibəsində Qarabağdan gedərək Rusiya ordusunun sıralarında döyüşlərə qatılan 450 erməni separatçısının öldürüldüyü, daha 60 nəfərin taleyinin isə naməlum olduğu bildirilir.
ilkinxeber.az informasiya agentliyi xəbər verir ki, bu barədə erməni jurnalist Roman Baqdasaryan məlumat yayıb.
Jurnalistin sözlərinə görə, separatçılar Rusiya ordusunun tərkibində döyüşərək ukraynalı uşaqların ölümünə səbəb olurlar. O, onların Rusiya ordusuna cəlb edilməsində Qarabağdan olan generalların da iştirak etdiyini iddia edib.
Roman Baqdasaryan, həmçinin Ukrayna hərbçiləri tərəfindən öldürülən separatçılardan birinə aid görüntülər paylaşıb. Kadrlarda həlak olan şəxsin üzərindən çıxarıldığı bildirilən parça da əks olunub.
Qeyd edək ki, Azərbaycanın öz ərazilərində separatçılığa son qoymasından sonra Qarabağdan çıxan bir sıra erməni separatçılarının Rusiyaya getdiyi və Rusiya ordusunun tərkibində döyüşlərə cəlb olunduğu barədə məlumatlar yayılıb. Bu proseslə bağlı Rusiyanın kütləvi informasiya vasitələrində də müxtəlif materiallar dərc edilib.
450 nəfərin öldürülməsi və 60 nəfərin taleyinin naməlum qalması ilə bağlı məlumatlar erməni jurnalistin açıqlamasına əsaslanır.
