Bu ilin yanvar-avqust aylarında Azərbaycanda təxminən 4 300 layihənin maliyyələşdirilməsi üçün 223 milyon manat güzəştli kredit ayrılıb.
ilkinxeber.az informasiya agentliyi xəbər verir ki, bu barədə iqtisadiyyat nazirinin birinci müavini Elnur Əliyev Bakıda keçirilən III Milli Rəqabət Forumunda məlumat verib.
Nazir müavininin sözlərinə görə, sentyabrın 1-dək ölkədə 528 sahibkarlıq subyektinə ümumilikdə 633 investisiya təşviqi sənədi təqdim edilib. Bu layihələr çərçivəsində 9,3 milyard manat investisiyanın yatırılması və təxminən 47 min yeni iş yerinin yaradılması planlaşdırılır.
Elnur Əliyev bildirib ki, 17 strateji istiqaməti əhatə edən investisiya təşviqi mexanizminin müddəti 2029-cu ilə qədər uzadılıb.
O qeyd edib ki, investisiya təşviqi sənədlərinin verilməsi ilə yanaşı, nəzərdə tutulan layihələrin faktiki icrası, müəssisələrin fəaliyyətə başlaması və yeni iş yerlərinin açılması da diqqətdə saxlanılmalıdır. Nazir müavini vurğulayıb ki, eyni yanaşma iri investisiya razılaşmalarına da şamil edilməlidir.
Elnur Əliyev biznesin rəqabət qabiliyyətinin artırılmasında infrastruktur xidmətlərinin roluna da toxunub. Onun fikrincə, enerji, su, nəqliyyat və rabitə xidmətlərinin qiyməti, keyfiyyəti və etibarlılığı istehsal müəssisələrinin fəaliyyətinə birbaşa təsir göstərir.
Nazir müavini bildirib ki, sahibkarların müasir avadanlıqlardan istifadə etməsi və idarəetməni təkmilləşdirməsi ilə yanaşı, infrastrukturun yenilənməsi, qoyulan investisiyaların geri dönüşü və istifadəçilərin maraqları arasında tarazlıq qorunmalıdır. O, həmçinin xidmətlərə qoşulma şərtlərinin, xidmət standartlarının və müraciətlərə baxılma müddətlərinin aydın müəyyənləşdirilməsinin biznes üçün əhəmiyyətini qeyd edib.
Dövlət-özəl tərəfdaşlığının infrastrukturun inkişafı üçün əlavə imkanlar yaratdığını bildirən Elnur Əliyev Xəzər dənizinin suyunun duzsuzlaşdırılması layihəsi üzrə müqavilənin imzalanmasını bu istiqamətdə mühüm addım kimi qiymətləndirib.
Onun sözlərinə görə, Nazirlər Kabineti 2026–2027-ci illər üzrə ümumilikdə 9 layihəni təsdiqləyib. Nazir müavini belə layihələrdə rəqabətli seçim mexanizminin tətbiqinin, risklərin düzgün bölüşdürülməsinin və müqavilə öhdəliklərinin dəqiq müəyyənləşdirilməsinin vacibliyini vurğulayıb.
O əlavə edib ki, layihələrin seçim mərhələsində əldə olunan üstünlüklər son nəticədə xidmətlərin keyfiyyətinin yüksəldilməsinə və dövlət vəsaitindən səmərəli istifadəyə xidmət etməlidir.
